ແຂວງອັດຕະປື ໄດ້ກໍານົດມາດຕະການສໍາຄັນເພື່ອຮັບມືລາຄາສິນຄ້າອຸປະໂພກ-ບໍລິໂພກ ທີ່ມີການເໜັງຕີງສູງຂຶ້ນ

    0
    66

    ແຂວງອັດຕະປື ໄດ້ກໍານົດມາດຕະການສໍາຄັນເພື່ອຮັບມືລາຄາສິນຄ້າອຸປະໂພກ-ບໍລິໂພກ ທີ່ມີການເໜັງຕີງສູງຂຶ້ນ

    ທ່ານ ສັນຕິໄຊ ສີລືໄຊ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງອັດຕະປື ໄດ້ຊີ້ແຈງຕໍ່ກອງປະຊຸມ ສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ໃນວັນທີ 16 ສິງຫາ 2022 ນີ້ວ່າ: ກ່ຽວກັບການຄຸ້ມຄອງ, ກວດກາ ແລະ ແກ້ໄຂສະພາບການເໜັງຕີຂອງລາຄາສິນຄ້າ ໃນສະພາບຄວາມຫຍຸ້ງຍາກທາງດ້ານເສດຖະກິດ, ແມ່ນໄດ້ເອົາໃຈໃສ່ຢ່າງຈິງຈັງໃນການລົງຕິດຕາມ,

    ກວດກາ ແລະ ຄຸ້ມຄອງລາຄາສິນຄ້າ ທີ່ກະທົບໄວຕໍ່ຊີວິດການເປັນຢູ່ ຂອງພໍ່ແມ່ປະຊາຊົນ ຕາມທ້ອງຕະຫຼາດເປັນປົກກະຕິ ໂດຍສະເພາະແມ່ນສິນຄ້າປະເພດເຂົ້າ, ຊີ້ນ, ປາ, ພືດຜັກ ແລະ ອື່ນໆ ໄດ້ລົງກວດກາປົກກະຕິອາທິດລະ 1 ຫາ 2 ຄັ້ງ.

    ມາຮອດປັດຈຸບັນ ການຄຸ້ມຄອງລາຄາສິນຄ້າປະເພດເຂົ້າ, ຊີ້ນ, ປາ, ພືດຜັກ ແລະ ອື່ນໆ ແມ່ນມີການເໜັງຕີງຂຶ້ນຍ້ອນການນໍາເຂົ້າສ່ວນໃຫຍ່ມາຈາກຕ່າງແຂວງ ແຕ່ກໍ່ສາມາດຄວບຄຸມໄດ້, ສໍາລັບລາຄາສິນຄ້າປະເພດເຄື່ອງອຸປະໂພກ-ບໍລິໂພກ ແມ່ນມີການເໜັງຕີງຂຶ້ນຕາມກົນໄກຕະຫຼາດ, ລາຄານໍ້າມັນສູງ, ເງິນກີບອ່ອນຄ່າ, ເງິນຕາຕ່າງປະເທດມີອັດຕາເພີ່ມສູງ, ການນຳເຂົ້າສ່ວນໃຫຍ່ແມ່ນ

    ຈາກຕ່າງແຂວງ ໂດຍສະເພາະຈາກແຂວງຈໍາປາສັກ, ເຊິ່ງການຈັດຕັ້ງປະຕິບັດວຽກງານຄຸ້ມຄອງລາຄາ ກັບຜູ້ປະກອບການກໍຄື ຜູ້ຄ້າຊາວຂາຍໃນທ້ອງຕະຫຼາດ ແລະ ໄດ້ຮ່ວມກັບຜູ້ຈັດສັນຕະຫຼາດເຜີຍແຜ່ຜ່ານລະບົບໂທລະໂຄ່ງ ເພື່ອເປັນການປຸກລະດົມຈິດໃຈພໍ່ແມ່ປະຊາຊົນ ໃຫ້ຮັບຮູ້ ແລະ ເຂົ້າໃຈກ່ຽວດຳລັດວ່າດ້ວຍການຄຸ້ມຄອງລາຄາສິນຄ້າ, ຄ່າບໍລິການ ແລະ ການຈໍລະຈອນສິນຄ້າພາຍໃນແຂວງ.

    ສໍາລັບມາດຕະການໃນຕໍ່ໜ້າ ທາງພະແນກອຸດສະຫະກໍາ ແລະ ການຄ້າແຂວງ ຈະເພີ່ມທະວີເອົາໃຈໃສ່ຄຸ້ມຄອງ, ຕິດຕາມ ແລະ ກວດກາສະພາບການເໜັງຕີງຂອງລາຄາສິນຄ້າທີ່ມີຄວາມອ່ອນໄຫວ ແລະ ກະທົບໄວຕໍ່ຊີວິດການເປັນຢູ່ຂອງປະຊາຊົນ ໃນແຕ່ລະໄລຍະ, ໂດຍສະເພາະຈະຕິດຕາມກວດກາ ເປັນພິເສດໃນໄລຍະເທສະການ, ງານບຸນປະເພນີ, ວັນສຳຄັນຕ່າງໆຂອງຊາດ ຫຼື ໃນໄລຍະເກີດ

    ໄພພິບັດ ແລະ ວິກິດການຕ່າງໆທີ່ເກີດຂຶ້ນ ໃຫ້ຢູ່ໃນສະພາບປົກກະຕິທີ່ສາມາດຄວບຄຸມໄດ້ ເພື່ອບໍ່ໃຫ້ເກີດການສວຍໂອກາດກັກຕຸນສິນຄ້າ ແລະ ຂຶ້ນລາຄາສິນຄ້າຕາມລຳພັງໃຈ ໂດຍບໍ່ໄດ້ຮັບອະນຸຍາດ ທີ່ເປັນການສ້າງຄວາມຫຍຸ້ງຍາກ ແລະ ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພໍ່ແມ່ປະຊາຊົນ.
    ຂ່າວອອນລາຍອຂວງອັດຕະປື

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.