ສ.ເກົາຫລີ ຝົນຕົກໜັກສຸດໃນຮອບ 80 ປີ ເສຍຊີວິດ 7 ຄົນ ສູນຫາຍອີກ 6 ຄົນ

    0
    80

    ໃນຄືນວັນທີ 8 ສິງຫາ 2022, ນະຄອນຫລວງເຊອຸນຂອງ ສ.ເກົາຫລີ ແລະ ເຂດພື້ນທີ່ອ້ອມຮອບຜະເຊີນຝົນຕົກໜັກສຸດໃນຮອບ 80 ປີ ສົ່ງຜົນໃຫ້ເກີດນ້ຳຖ້ວມກະທັນຫັນ ໂດຍມີຜູ້ເສຍຊີວິດ 7 ຄົນ ແລະ ສູນຫາຍອີກ 6 ຄົນ. ຂະນະທີ່ເຮືອນ, ລົດຍົນ, ອາຄານ ແລະ ສະຖານີລົດໄຟຟ້າໃຕ້ດິນໄດ້ຮັບຄວາມເສຍຫາຍໜັກ.

    ສຳນັກຂ່າວ Yonhap ຂອງ ສ.ເກົາຫລີ ລາຍງານວ່າ: ຫລາຍພື້ນທີ່ຂອງນະຄອນຫລວງເຊອຸນ ລວມທັງເມືອງອິນຊອນ ແລະ ແຂວງຢອງກີ ເຊິ່ງຢູ່ໃກ້ຄຽງ ຜະເຊີນຝົນຕົກໜັກເຖິງ 100 ມິນລີແມັດຕໍ່ຊົ່ວໂມງໃນຄືນວັນທີ 8 ສິງຫາ. ຂະນະທີ່ເຂດດົງຈັກໃນໄລຍະໜຶ່ງມີປະລິມານນ້ຳຝົນສູງເຖິງ 141,5 ມິນລີແມັດຕໍ່ຊົ່ວໂມງ ເຊິ່ງຖືເປັນຕົວເລກນ້ຳຝົນຕໍ່ຊົ່ວໂມງສູງສຸດນັບແຕ່ປີ 1942.

    ໃນຈຳນວນຜູ້ເສຍຊີວິດດັ່ງກ່າວ ມີຄອບຄົວໜຶ່ງເຊິ່ງມີສະມາຊິກ 3 ຄົນເສຍຊີວິດທັງໝົດ ເນື່ອງຈາກຕົກຄ້າງຢູ່ໃນເຮືອນພັກເຄິ່ງໃຕ້ດິນໃນໄລຍະທີ່ນ້ຳຖ້ວມໜັກ. ຂະນະທີ່ປະຊາຊົນຫລາຍຮ້ອຍຄົນອົບພະຍົບອອກຈາກພື້ນທີ່ມາພັກອາໄສໃນໂຮງຮຽນ ຫລື ອາຄານສາທາລະນະອື່ນໆຊົ່ວຄາວ ເພື່ອຄວາມປອດໄພ, ສ່ວນບໍລິການສາທາລະນະຫລາຍປະເພດເຊັ່ນ: ລົດໄຟ ແລະ ລົດໄຟຟ້າໃຕ້ດິນບາງເສັ້ນໄດ້ປິດໃຫ້ບໍລິການຊົ່ວຄາວ.

    ກົມອຸຕຸນິຍົມວິທະຍາ ສ.ເກົາຫລີ ເປີດເຜີຍວ່າ: ຄາດວ່ານະຄອນຫລວງເຊອຸນ ແລະ ແຂວງຄັງວອນຈະມີຝົນຕົກໜັກໄປຮອດວັນທີ 10 ສິງຫານີ້ ໂດຍມີປະລິມານນ້ຳຝົນປະມານ 300 ມິນລີແມັດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.