ທ່ານນາຍົກຢາກໄປທ່ຽວຄຸນໝິງຫຼັງຈາກເປີດປະເທດ ດ້ວຍລົດໄຟລາວ-ຈີນ

    0
    163

    ຕາມການສຳພາດຂອງ CRI ໃຫ້ຮູ້ວ່າ: ໃນຂະນະທີ່ ທ່ານນາຍົກລັດຖະມົນຕີ ພັນຄໍາ ວິພາວັນ ໄດ້ນັ່ງລົດໄຟລາວ-ຈີນ ຮອບປະຖົມມະເລີກກັບພັນລະຍາ ພ້ອມດ້ວຍຄະນະເດີນທາງຈາກສະຖານີນະຄອນລວງວຽງຈັນຫາສະຖານີວັງວຽງໃນວັນທີ 3 ທັນວາ 2021. ທ່ານໄດ້ສະແດງຄວາມດີໃຈເປັນຢ່າງຍິ່ງ ພ້ອມທັງຕີລາຄາສູງ ແລະກ່າວວ່າຢາກໄປທ່ຽວຄຸນໝິງ ແລະປັກກິ່ງອີກຄັ້ງຫຼັງຈາກເປີດການທ່ອງທ່ຽວລະຫວ່າງປະເທດ.

    ທ່ານນາຍົກໃຫ້ຮູ້ວ່າ: ການເປີດເສັ້ນທາງລົດໄຟລາວ-ຈີນ ຄັ້ງນີ້ເປັນຄັ້ງປະຫວັດສາດທີ່ ສປປ ລາວຮ່ວມກັບ ສປ ຈີນສາມາດສ້າງສໍາເລັດລົດໄຟຄວາມໄວສູງ ແລະບໍ່ເຄີຍມີມາໃນປະເທດລາວມາກ່ອນ. ປະເທດລາວ ກໍ່ຄືປະຊາຊົນລາວໄດ້ປ່ຽນໂສມໜ້າທີ່ຫຼ້າຫຼັງທາງດ້ານຄົມມະນາຄົມທາງບົກກາຍມາເປັນການຄົມມະນາຄົມທີ່ທັນສະໄໝທີ່ບໍ່ເຄີຍມີ ເຊິ່ງຜົນສໍາເລັດອັນນີ້ ເກີດຂຶ້ນມາຈາກການຮ່ວມມືສອງພັກສອງລັດ ແລະປະຊາຊົນສອງຊາດລາວ-ຈີນ ຈີນ-ລາວ ທີ່ໄດ້ຂະຫຍາຍຍຸດທະສາດໜຶ່ງແລວໜຶ່ງເສັ້ນທາງຂອງທ່ານ ສີ

    ຈິ້ນຜິງສອດຄ່ອງກັບການພັດທະນາຂອງປະເທດລາວ ທີ່ບໍ່ມີເສັ້ນທາງອອກທາງທະເລ ໃຫ້ກາຍເປັນປະເທດເຊື່ອໂຍງ ແລະເຊື່ອມຈອດ ຍ້ອນແນວນັ້ນ ເສັ້ນທາງລົດໄຟລາວ-ຈີນ ເສັ້ນນີ້ຈະນໍາເອົາຜົນປະໂຫຍດຢ່າງຫຼວງຫຼາຍໃນການພັດທະນາເສດຖະກິດສັງຄົມຂອງປະເທດລາວຂອງເຮົາ ແລະເປັນຈຸດເຊື່ອມຕໍ່ປະເທດຈີນປະຫາປະເທດອາຊຽນ ແລະພາກພື້ນ. ທ່ານພັນຄໍາຍັງຕີລາຄາສູງວ່າ: ຜົນສໍາເລັດໂຕນີ້ຍັງເປັນໂຕແບບທີ່ດີຂອງການຮ່ວມມືຊາຕາກໍາລາວ-ຈີນ ໃນຖານະປະເທດບ້ານໃກ້ເຮືອນຄຽງບ້ານພີ່ເມືອງນ້ອງຕາມທິດສີ່

    ດີ, ເວົ້າລວມແລ້ວຈີນເປັນປະເທດໃຫຍ່ມະຫາອໍານາດມີພົນລະເມືອງຫຼາຍ ແຕ່ເຮົາເປັນປະເທດນ້ອຍ ແລະທຸກຍາກ ພົນລະເມືອງກໍ່ໜ້ອຍຫຼາຍ ເຊິ່ງອັນນີ້ພັດສະແດງໃຫ້ເຫັນວ່າໃຫຍ່ກັບນ້ອຍໄດ້ຄຽງຄູ່ກັນ ເປັນເພື່ອມິດທີ່ດີຕໍ່ກັນ ແລະເປັນແບບຢ່າງທີ່ດີທີ່ສຸດໃນວົງຄະນະຍາດສາກົນ ເພາະວ່າການພົວພັນສອງພັກສອງລັດ ແລະປະຊາຊົນສອງຊາດ ແມ່ນສະເໝີພາບ ບົນຈິດໃຈທີ່ຈິງໃຈຕໍ່ກັນອີຫຼີ ບໍ່ເອົາປຽບເອົາລັດກັນ ແລະມີຜົນປະໂຫຍດຮ່ວມກັນ ທຸກສຸກກໍ່ຢູ່ຮ່ວມກັນ ອັນນີ້ເປັນສິ່ງສໍາຄັນຫຼາຍ. ໃນປັດຈຸບັນນີ້, ລັດຖະ

    ບານກໍາລັງຈັດຕັ້ງແລວເສດຖະກິດຕາມທາລົດໄຟ, ເສດຖະກິດເໜືອໃຕ້ຕາເວັນຕົກ ແລະຕາເວັນອອກ ຈະນໍາພາປະຊາຊົນຜະລີດເປັນສິນຄ້າ ແລະສົ່ງອອກປະເທດ ໂດຍໃຊ້ທາງລົດໄຟຂົນສົ່ງ ຕາມລົດໄຟທີ່ສາມາດອອກລົດໄຟ 15 ນາທີຕໍ່ຂະບວນໜຶ່ງ ແລະບັນທຶກໄດ້ 3,000 ໂຕ່ນ/ຂະບວນໜຶ່ງ ເກືອບເທົ່າ 400 ຄັນລົດຂົນສົ່ງທາງບົກທົ່ວໄປ ອັນນີ້ນໍາເອົາຜົນປະໂຫຍດມະຫາສານ, ສະນັ້ນປະຊາຊົນຕ້ອງດຸໝັ່ນຜະລິດເປັນສິນຄ້າ ໂດຍມີລັດຖະບານຈະສົ່ງເສີມ ແລະມີນະໂຍບາຍໃຫ້.

    ທ່ານນາຍົກຍັງເວົ້າວ່າ: ຖ້າຫາກເປີດປະເທດ ແລະສາມາດໄປທ່ຽວໄດ້ແລ້ວ ຈະໄປທ່ຽວທ່ຽວຄຸນໝິງກ່ອນ ເຊິ່ງເເປັນບ່ອນທີ່ໃກ້ຄຽງທີ່ສຸດ ແລະຄຸນໝິງ ແຂວງຢຸນນານເປັນແຂວງທີ່ລັດຖະບານຈີນໄດ້ຮ່ວມມືຫຼາຍດ້ານກັບ ສປປ ລາວ. ຫຼັງຈາກນັ້ນ, ຈະໄປທ່ຽວປັກກິ່ງ ທີ່ເປັນເມືອງຫຼວງຂອງ ສປ ຈີນ ເຖິງວ່າໄດ້ໄປແລ້ວແຕ່ກໍ່ຢາກໄປອີກຍ້ອນປະທັບໃຈຫຼາຍ.

    ພ້ອມດຽວກັນທ່ານນາຍົກຍັງໄດ້ຮຽກຮ້ອງໃຫ້ປະຊາຊົນທຸກທົ່ວໜ້າຮ່ວມມືກັນກັບລັດຖະບານ ກໍຄືອໍານາດການປົກຄອງທ້ອງຖິ່ນ ເຊິ່ງພວກເຮົາມີແຜນແລ້ວກໍ່ກຽມພ້ອມກັນເຮັດກັນສ້າງປັດຈຸບັນຂອງພວກເຮົາຢ່າງຕັ້ງໜ້າຕັ້ງຕາ ແລະເຊື່ອວ່າອະນາຄົດ ປະເທດເຮົາຈະມີຄວາມຈະເລີນພັດທະນາຫຼາຍກວ່ານີ້ຢ່າງແນ່ນອນ.
    ພາບ-ຂ່າວ: ສອນປະເສີດ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.