ແຂວງວຽງຈັນ ເອົາຈິງປະກາດ 13 ຂໍ້ ໃນຊ່ວງບຸນປີໃໝ່ລາວ ໃຜຝ່າຝືນຢືດໃບທະບຽນ ພ້ອມໃຫ້ປິດກິດຈະການ

    0
    1262

    ເຈົ້າແຂວງໆ ວຽງຈັນ ອອກແຈ້ງການ ສະບັບເລກ 007/ຈຂ.ວຈ. ລົງວັນທີ 13 ເມສາ 2021 ເລື່ອງ: ການສະເຫຼີມສະຫຼອງບຸນປີໃໝ່ລາວ ປີ ພສ 2554 ( ຄສ 2021 ) ຕິດພັນກັບການເພີ່ມທະວີ ແລະ ເອົາໃຈໃສ່ໃນການປະຕິບັດມາດຕະການ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ -19. ເພື່ອຮັບປະກັນຄວາມສະຫງົບ ໃນງານສະເຫຼີມສະຫຼອງວັນບຸນປີໃໝ່ລາວ ປີ ພສ 2554 ( ຄສ 2021 ) ມີຄວາມເປັນລະບຽບຮຽບຮ້ອຍຈົບງາມ. ພ້ອມທັງຮັບປະກັນການປ້ອງກັນ, ສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ໃຫ້ຖືກຕ້ອງຕາມວັດທະນະທໍາ, ຮີດຄອງປະເພນີອັນດີງາມຂອງຊາດລາວ.
    ເຈົ້າແຂວງ, ແຂວງວຽງຈັນ ອອກແຈ້ງການ ດັ່ງນີ້:

    1. ກໍານົດວັນພັກສະເຫຼີມສະຫຼອງບຸນປີໃໝ່ລາວ ພສ 2554 ໃຫ້ເປັນເອກະພາບ ໃນວັນທີ 14,15 ແລະ 16 ເມສາ 2021.2. ການຈັດຕັ້ງສະຫຼອງບຸນປີໃໝ່ລາວ ໃຫ້ປະຕິບັດຕາມຮີດຄອງປະເພນີ ແລະ ຂະນົບທໍານຽມອັນດີງາມຂອງຊາດລາວ ເຊິ່ງຈັດຂຶ້ນຢູ່ພາຍໃນຄອບຄົວ, ສຳນັກງານ ອົງການ, ວັດວາອາຣາມ ແລະ ສະຖານທີ່ສັກກະລະບູຊາຕ່າງໆ ບົນພື້ນຖານກະທັດຮັດ ງ່າຍດາຍ, ຫ້າມບໍ່ໃຫ້ມີການຊຸມນຸມ ຊຸມແຊວທີ່ມີການເຂົ້າຮ່ວມຂອງຄົນຈໍານວນຫຼາຍ.3. ບໍ່ອະນຸຍາດໃຫ້ດໍາເນີນກິດຈະກໍາໃນຊ່ວງໄລຍະບຸນປີໃໝ່ລາວນີ້ ເຊັ່ນ: ການສະແດງສິລະປະດົນຕີຢູ່ຕາມວັດວາ ອາຣາມ, ສະຖານທີ່ສາທາລະນະຕ່າງໆ ລວມທັງຢູ່ຕາມຫາດແຄມນໍ້າໃຫ້ຢຸດຕິຢ່າງເດັດຂາດ, ຫ້າມຫົດນໍ້າກັນ, ດ້ວຍນ້ຳເປື້ອນ, ນໍ້າສີ ຫຼື ນໍາໃຊ້ພາຫະນະ, ອຸປະກອນອື່ນໆ ເພື່ອຫົດນ້ໍາຄົນອື່ນຢູ່ຕາມຖະໜົນຫົນທາງ ແລະ ສະຖານທີ່ຕ່າງໆ.

    4. ໃຫ້ປິດຊົ່ວຄາວ ສະຖານທີ່ບັນເທິງ, ຮ້ານຄາຣາໂອເກະ, ຮ້ານກິນດື່ມ ແລະ ຫ້າມຈັດງານລ້ຽງໃນງານດອງ, ງານພົບປະສ້າງສັນທີ່ມີການເຂົ້າຮ່ວມຈໍານວນຫຼາຍ ຕະຫຼອດເດືອນເມສາ 2021.5. ຖ້າບໍ່ຈໍາເປັນແມ່ນໃຫ້ຫຼີກລ້ຽງການເດີນທາງໄປຕ່າງເມືອງ ຫຼື ຕ່າງແຂວງ ໃນຕະຫຼອດເດືອນເມສາ 2021 ເພື່ອຫຼີກລ້ຽງການແຜ່ລະບາດຂອງພະຍາດໂຄວິດ-19.6. ກໍາລັງປ້ອງກັນຊາດ-ປ້ອງກັນຄວາມສະຫງົບແຂວງ ສົມທົບກັບພາກສ່ວນກ່ຽວຂ້ອງ ເອົາໃຈໃສ່ເຝົ້າລະວັງຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ, ຕ້ານ ແລະ ແກ້ໄຂທຸກປະກົດການຫຍໍ້ທໍ້ໃນສັງຄົມໃຫ້ທັນ. ການເພີ່ມທະວີວຽກງານຕິດຕາມ, ກວດກາ, ອັດປ່ອງຂ້າມລອຍຈຸດຫຼໍ່ແຫຼມ ຂອບເຂດຊາຍແດນທີ່ເຫັນວ່າມີຄວາມສ່ຽງ, ເຂັ້ມງວດໃນການກວດກາຄົນເຂົ້າ-ອອກບ້ານ, ເມືອງແບບບໍ່ເປັນທາງການໃນທົ່ວແຂວງ.

    7. ກໍາລັງປ້ອງກັນຄວາມສະຫງົບ ຈັດຕັ້ງກໍາລັງຈະລາຈອນສົມທົບພາກສ່ວນໂຍທາທິການ ແລະ ຂົນສົ່ງ, ບໍລິສັດ, ຜູ້ຮັບເໝົາກໍ່ສ້າງ, ກວດກາຕາມເສັ້ນທາງທີ່ກໍາລັງກໍ່ສ້າງ, ຖ້າບ່ອນໃດ ມີຄວາມສ່ຽງຈະເກີດອຸປະເຫດ ໃຫ້ໃສ່ປ້າຍຫ້າມປ້າຍສັນຍານຕ່າງໆ ໃຫ້ນັກຂັບຂີມີສະຕິ, ລົງປະຈໍາປ້ອມເພື່ອສະກັດກັ້ນອຸປະຕິເຫດຕາມທ້ອງຖະໜົນ ແລະ ສັງເກດການສັນຈອນຂອງນັກຂັບຂີ່ ກໍລະນີພົບເຫັນເຫດການທີ່ບໍ່ດີ, ບໍ່ຮັບປະກັນຄວາມປອດໄພກໍ່ຄວນຕັກເຕືອນ, ສຶກສາອົບຮົມ ແລະ ຖ້າຮ້າຍແຮງແມ່ນໃຊ້ມາດຕະການຕາມລະບຽບກົດໝາຍ,

    8. ແຕ່ລະພາກສ່ວນໃຫ້ຈັດຕັ້ງພະນັກງານປະຈໍາການຢູ່ຫ້ອງການຂອງຕົນຕະຫຼອດ 24 ຊົ່ວໂມງ, ສະເພາະກາລັງປ້ອງກັນຊາດ-ປ້ອງກັນຄວາມສະຫງົບ ເປັນເຈົ້າການສົມທົບພາກສ່ວນ ອອກກວດກາລາດຕາເວນຂອບເຂດຄວາມຮັບຜິດຊອບຂອງຕົນຕາມຄວາມເໝາະສົມ, ເວລາ 23:00 ໂມງ ແມ່ນໃຫ້ປີດການສັນຈອນຕາມທ້ອງຖະໜົນພາຍໃນແຂວງ (ຍົກເວັ້ນກໍລະນີຈໍາເປັນ).

    9. ຄະນະສະເພາະກິດສະກັດກັ້ນ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ຂັ້ນແຂວງ ແລະ ເມືອງ ສິບຕໍ່ປະຕິບັດໜ້າທີ່ຂອງຕົນ ດ້ວຍມາດຕະການຕ່າງໆ ພ້ອມທັງສຸມໃສ່ການສັກວັກຊີນປ້ອງກັນຕາມແຜ່ນການທີ່ກໍານົດໄວ້ ເພື່ອແນໃສ່ຮັບປະກັນບໍ່ໃຫ້ມີການແຜ່ລະບາດພະຍາດໂຄວິດ-19. ກໍລະນີພົບເຫັນມີແຮງງານລັກລອບເຂົ້າມາແມ່ນໃຫ້ນໍາເຂົ້າສູນກັກໂຕທີ່ລັດໄດ້ກໍານົດໄວ້.10. ພະແນກອຸດສະຫະກໍາ ແລະ ການຄ້າ ສົມທົບກັບພາກສ່ວນກ່ຽວຂ້ອງ ຕິດຕາມ, ກວດກາ, ຄຸ້ມຄອງລາຄາສິນຄ້າໃຫ້ຢູ່ເກນປົກກະຕິ, ເດັດຂາດບໍ່ໃຫ້ຜູ້ປະກອບການສວຍ ໂອກາດຂຶ້ນລາຄາສິນຄ້າທຸກປະເພດໃນຊ່ວງປີໃໝ່ລາວ.

    11. ມອບໃຫ້ພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວແຂວງວຽງຈັນ ຈັດຕັ້ງເຜີຍແຜ່ແຈ້ງການສະບັບນີ້ໃຫ້ ພະແນກການ, ອົງການ, ເມືອງ ແລະ ພາກສ່ວນກ່ຽວຂ້ອງທົ່ວແຂວງ. 12.ກໍລະນີກວດກາພົບເຫັນຜູ້ລະເມີດຕໍ່ແຈ້ງການນີ້ ຄັ້ງທໍາອິດໃຫ້ກ່າວເຕືອນ ພ້ອມທັງເຮັດບົດບັນໄວ້ເປັນຫຼັກຖານ,ຫາກຍັງສືບຕໍ່ລະເມີດຕື່ມອີກ ແມ່ນໃຫ້ຢຶດໃບທະບຽນ ແລະ ປິດກິດຈະການ ພ້ອມທັງປັບໄໝຕາມລະບຽບການ. 13. ມອບໃຫ້ອົງການປົກຄອງເມືອງ(ເຈົ້າເມືອງ, ພະແນກການ, ອົງການ ແລະ ຫ້ອງການທີ່ກ່ຽວຂ້ອງນໍາເອົາແຈ້ງການສະບັບນີ້ ໄປເຜີຍແຜ່, ຊີ້ນໍາ ແລະ ເປັນເຈົ້າການຈັດຕັ້ງປະຕິບັດຢ່າງເຂັ້ມງວດ ດ້ວຍຄວາມຮັບຜິດຊອບສູງ. 14. ແຈ້ງການ ຫຼື ນິຕິກຳໃດຂອງແຂວງ ທີ່ຂັດກັບແຈ້ງການສະບັບນີ້ ລ້ວນແຕ່ເປັນໂມຄະ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.