ຄັ້ງທຳອິດເມືອງແກ່ນທ້າວ ເປີດຕະຫຼາດນັດຊື້-ຂາຍ ງົວ ຄວາຍ

    0
    388

    ເປັນທີ່ຮູ້ກັນດີວ່າບ້ານເຮົາເປັນປະເທດກະສິກຳ, ປະຊາຊົນສ່ວນໃຫຍ່ຖືອາຊີບເປັນຊາວກະສິກອນ, ເກືອບວ່າຄົວເຮືອນຈຳນວນຫຼວງຫຼາຍແມ່ນມີສັດລ້ຽງເປັນຂອງຕົນເອງບໍ່ຫຼາຍກໍ່ໜ້ອຍ ແຕ່ໃນໄລຍະຜ່ານມາ ການລ້ຽງສັດຂາຍຍັງບໍ່ທັນເປັນຂະບວນຟົດຟື້ນ ມີແຕ່ຄົນຮູ້ຈັກກັນບອກຕໍ່ໆກັນໄປ ແຕ່ເມື່ອມໍ່ໆມານີ້ເລີ່ມມີຈຸດນັດພົບຂອງຜູ້ຊື້-ຂາຍງົວ, ຄວາຍ ທຳອິດເກີດຢູ່ແຂວງຊຽງຂວາງ ແລະຫຼ້າສຸດແມ່ນ ເມືອງແກ່ນທ້າວ ແຂວງໄຊຍະບູລີໄດ້ມີພິທີເປີດຕະຫຼາດນັດສັດປະເພດງົວ, ຄວາຍຂຶ້ນ ເພື່ອອຳນວຍຄວາມສະດວກ

    ແກ່ຊາວກະສິກອນຜູ້ລ້ຽງສັດໃຫຍ່ ແລະຜູ້ຕ້ອງການຊື້ໄດ້ມາພົບພໍ້ກັນ.ພິທີເປີດງານຕະຫຼາດນັດມີຂື້ນໃນວັນທີ 17 ມີນາ 2021 ຜ່ານມາ ໂດຍການເປັນກຽດເຂົ້າຮ່ວມຂອງ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ, ແຂວງໄຊຍະບູລີ, ມີຫົວໜ້າ, ຮອງຫົວໜ້າຫ້ອງການ, ລັດວິສາຫະກິດ, ແຂກຖືກເຊີນຈາກເມືອງອ້ອມຂ້າງ, ນາຍບ້ານເທດສະບານ ແລະ ກຸ່ມຜູ້ຊື້ສັດໃຫຍ່ເຂົ້າຮ່ວມຢ່າງຫຼວງຫຼາຍ.ທ່ານ ບຸນໂຮມ ໂພທິລັກ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງແກ່ນທ້າວ ໄດ້ລາຍງານວ່າ:

    ພາຍຫຼັງໄດ້ຮັບມອບໝາຍຈາກຄະນະປະຈໍາພັກເມືອງ ທາງຫ້ອງການອຸດສາຫະກໍາ ແລະ ການຄ້າເມືອງ ໄດ້ຈັດກອງປະຊຸມປຶກສາຫາລືເພື່ອຄວາມເປັນເອກະພາບ, ແບ່ງຄວາມຮັບຜິດຊອບຢ່າງລະອຽດ ແລະ ເກັບກໍາຂໍ້ມູນດ້ານຕ່າງໆ ໂດຍປະສານງານກັບຂະແໜງການທີ່ກ່ຽວຂ້ອງ ແລະ ນັກທຸລະກິດຜູ້ປະກອບການ, ຈັດກອງປະຊຸມປຶກສາຫາລື ຮ່າງກົດລະບຽບຄຸ້ມຄອງຕະຫຼາດສັດໃຫຍ່ຢູ່ພາຍໃນເມືອງ, ຄັດເລືອກເອົາຄະນະກຸ່ມຊື້-ຂາຍສັດໃຫຍ່ ແລະ ກໍານົດສະຖານທີ່ເປີດຕະຫຼາດສັດຢູ່ບ້ານຈອມແກ້ວ ເຊິ່ງເຫັນວ່າເໝາະສົມ

    ແລະ ມີເນື້ອທີ່ກວ້າງ ເສັ້ນທາງເຂົ້າຫາສະດວກ ແລະ ຢູ່ຈຸດກາງເມືອງ.ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ໄດ້ກ່າວວ່າ: ການເປີດຕະຫຼາດນັດສັດໃນຄັ້ງນີ້ ແມ່ນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງວາງອອກ ໃນການສົ່ງເສີມທາງການຕະຫຼາດສັດລ້ຽງໃຫ້ມີຄວາມໝັ້ນທ່ຽງ, ສົ່ງເສີມການລ້ຽງສັດຂອງປະຊາຊົນ ໃຫ້ເປັນໄປຕາມເຕັກນິກວິທະຍາສາດ ຕິດພັນກັບການປຸງແຕ່ງທີ່ມີທັງປະລິມານ ແລະ ຄຸນນະພາບ ໄດ້ມາດຖານ ແລະ ຄວາມຕ້ອງການຂອງຕະຫຼາດ ທັງເປັນ

    ການຄຸ້ມຄອງການເຄື່ອນຍ້າຍສັດໃຫ້ມີຄວາມຖືກຕ້ອງ ແລະ ໃນຕໍ່ໜ້າໃຫ້ກາຍເປັນການພົບປະແລກປ່ຽນລະຫວ່າງຜູ້ຊື້ ແລະ ຜູ້ຂາຍສັດປະເພດຕ່າງໆ ບໍ່ວ່າຈະເປັນ ງົວ, ຄວາຍ, ໝູ, ແບ້, ເປັດ, ໄກ່ ສາມາດຂາຍ ແລະ ຊື້ຢູ່ຈຸດທີ່ກໍານົດນີ້.ໃນເວລາດຽວກັນທາງຄະນະບໍລິຫານກຸ່ມສົ່ງເສີມການລ້ຽງສັດ ຕ້ອງໄດ້ປຸກລະດົມປະຊາຊົນ ທີ່ມີດີນຕິດກັບສະຖານທີ່ຕະຫຼາດນັດໃຫ້ມີການປູກຫຍ້າເພື່ອຂາຍປ້ອນໃຫ້ແກ່ຕະຫຼາດ ໃຫ້ຜູ້ຊື້ຂາຍ ໄດ້ຊື້ຫຍ້ານຳເຂົາເຈົ້າມາເກືອສັດລ້ຽງກ່ອນສົ່ງສູ່ທາງທາງ ອັນສຳຄັນເປັນການກະຈາຍລາຍໄດ້ ໃຫ້ແກ່ຜູ້ຢູ່ໃກ້ຄຽງຕື່ມອີກ.

    ຂ່າວ: ຖວທ ເມືອງແກ່ນທ້າວ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.