ສປປ ລາວ ບໍ່ພົບຜູ້ຕິດເຊື້ອພະຍາດໂຄວິດ ເພີ່ມ

0
298

ໃນວັນທີ 15 ມີນາ 2021 ທ່ານ ນາງ ດຣ. ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ລາຍງານໃຫ້ຮູ້ວ່າ: ວັນທີ 14 ມີນາ 2021 ທົ່ວປະເທດມີຜູ້ເດີນທາງເຂົ້າມາ ມີທັງໝົດ 2.255 ຄົນ, ໃນນັ້ນຈຸດຜ່ານດ່ານລາວ- ໄທ ມີ 968 ຄົນ, ດ່ານລາວ-ຈີນ 35 ຄົນ, ດ່ານລາວ-ຫວຽດນາມ 1.005 ຄົນ ແລະ ຜ່ານສະໜາມບິນສາກົນວັດໄຕ 247 ຄົນ, ທຸກຄົນໄດ້ຜ່ານການວັດແທກອຸນຫະພູມຮ່າງກາຍ, ບໍ່ພົບຜູ້ມີອາການເປັນ ໄຂ້ ແລະ ໄດ້ເກັບຕົວຢ່າງທຸກຄົນມາກວດຊອກຫາຜູ້ຕິດເຊື້ອ COVID-19.

ປັດຈຸບັນທົ່ວປະເທດ ມີຜູ້ຖືກຈຳກັດບໍລິເວນຈໍານວນ 3.791 ຄົນ ຢູ່ 35 ສູນ ແລະ ນັບແຕ່ ວັນທີ 3 ມີນາ 2021 ເປັນຕົ້ນມາ ສປປ ລາວ ໄດ້ເລີ່ມນໍາໃຊ້ເຄື່ອງຕິດຕາມການແພດ (ໂມງ) ໂດຍເລີ່ມຕົ້ນນຳໃຊ້ສຳລັບຜູ້ທີ່ເດີນທາງເຂົ້າມາ ສປປ ລາວ ທາງສະໜາມບິນວັດໄຕສາກົນ ທຸກຄົນຕ້ອງໄດ້ໃສ່ໂມງຕິດຕາມໄລຍະຈຳກັດບໍລິເວນ 14 ວັນ. ສ່ວນການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 14 ມີນາ 2021 ໄດ້ເກັບຕົວຢ່າງມາກວດວິເຄາະທັງໝົດ 539 ຄົນ, ຜົນກວດວິເຄາະທັງໝົດບໍ່ພົບເຊື້ອ, ໝາຍຄວາມວ່າ ວັນທີ 14 ມີນາ 2021 ບໍ່ພົບຜູ້ຕິດເຊື້ອໃໝ່. ສໍາລັບຜູ້ຕິດເຊື້ອເບີ 44 ຜົນກວດແມ່ນບໍ່ພົບເຊື້ອຕິດຕໍ່ກັນ 2 ຄັ້ງ. ສະນັ້ນ, ມື້ນີ້ຜູ້

ກ່ຽວ ຈະໄດ້ອອກໂຮງໝໍ ແລະ ສືບຕໍ່ຕິດຕາມອາການຕົນເອງຢູ່ເຮືອນຈົນຄົບ 14 ວັນ. ມາຮອດປັດຈຸບັນ ຜູ້ຕິດເຊື້ອພະຍາດ COVID-19 ຍັງນອນຕິດຕາມປິ່ນປົວຢູ່ໂຮງໝໍຈໍານວນ 6 ຄົນ (ນະຄອນຫລວງ 3 ຄົນ, ຈຳປາສັກ 2 ຄົນ, ສະຫວັນນະເຂດ 1 ຄົນ), ທັງໝົດມີສຸຂະພາບຮ່າງກາຍຈິດໃຈສົມບຸນ ແລະ ແຂງແຮງດີ.
ສໍາລັບການສັກວັກແຊງປ້ອງກັນພະຍາດໂຄວິດ-19 ແມ່ນເພື່ອແກ້ໄຂພາວະສຸກເສີນ ຈາກການລະບາດຂອງພະຍາດໂຄວິດ-19 ຈຶ່ງໄດ້ສຸມໃສ່ກຸ່ມເປົ້າໝາຍບູລິມະສິດກ່ອນ ເປັນ

ຕົ້ນແມ່ນ ພະນັກ ງານແພດໝໍ, ພະນັກງານດ່ານໜ້າ ຜູ້ທີ່ມີຄວາມສ່ຽງສູງໃນສູນກາງ ແລະ ທ້ອງຖິ່ນ, ມາຮອດປັດຈຸບັນ ໄດ້ສັກເຂັມທີ 1 ໃຫ້ແກ່ກຸ່ມເປົ້າໝາຍບູລິມະສິດ ທັງໝົດ 40.732 ຄົນ ໃນຂອບເຂດທົ່ວປະເທດ ປະ ກອບມີ ພະນັກງານແພດໝໍກວມເອົາ 13.005 ຄົນ, ພະນັກງານເຮັດວຽກທີ່ມີຄວາມສ່ຽງ 22.791 ຄົນ, ຜູ້ເດີນທາງທີ່ມີຄວາມຈຳເປັນອອກນອກປະເທດ 625 ຄົນ, ຜູ້ສູງອາຍຸກ່ວາ 60 ປີ 220 ຄົນ, ຜູ້ທີ່ມີພະຍາດປະຈຳໂຕ 31 ຄົນ ແລະ ກຸ່ມອື່ນໆ 4.060 ຄົນ.

ແນວໃດກໍຕາມ, ເພື່ອຫລຸດຜ່ອນ ແລະ ສະກັດກັ້ນ ບໍ່ໃຫ້ເກີດການລະບາດເປັນວົງກວ້າງ ໃນປະເທດພວກເຮົາ ການປະຕິບັດມາດຕະການປ້ອງກັນການຕິດເຊື້ອແມ່ນມີຄວາມສຳຄັນທີ່ສຸດ. ສະນັ້ນ,ຈົ່ງພ້ອມໃຈກັນສືບຕໍ່ ປະຕິບັດໃຫ້ກາຍເປັນຄວາມເຄີຍຊີນ ກໍ່ຄື ການໃສ່ຜ້າປິດປາກ-ດັງ ເມື່ອເດີນທາງອອກຈາກເຮືອນ, ໝັ່ນລ້າງມືໃສ່ສະບູ ຫລື ເຈວລ້າງມືຂ້າເຊື້ອເລື້ອຍໆ, ຫລີກລ້ຽງການເດີນທາງໄປຍັງເຂດທີ່ມີຄວາມສ່ຽງ ຫລື ແອອັດ ແລະ ຮັກສາໄລຍະຫ່າງທາງສັງຄົມ.