ມອບລົດຈັກ 12 ຄັນ ທີ່ຄົນຮ້າຍລັກໄປ ຄືນເຈົ້າຂອງ

    0
    243

    ໃນວັນ 5 ມີນາ 2021 ທີ່ຜ່ານມາ, ເຈົ້າໜ້າທີ່ ປກສ ເມືອງສີສັດຕະນາກ ນະຄອນຫຼວງວຽງຈັນ ໄດ້ນໍາເອົາລົດຈັກ ຈໍານວນ 12 ຄັນ ທີ່ເກັບກູ້ຄືນມາໄດ້ ມອບໃຫ້ເຈົ້າຂອງ ກ່າວມອບໂດຍ ພັທ ອິນປັນ ຫາດາວເຮືອງ ຮອງຫົວໜ້າກອງບັນຊາການ ປກສ ເມືອງສີສັດຕະນາກ ແລະ ຕາງໜ້າຮັບໂດຍ ທ່ານ ສົມພອນ ຈັນດາລາ ປະຊາຊົນ ບ້ານສ້າງເຫວີຍ ເມືອງສີສັດຕະນາກ ນວ.

    ພັທ ອິນປັນ ຫາດາວເຮືອງ ໃຫ້ຮູ້ວ່າ: ພາຍຫຼັງໄດ້ຮັບແຈ້ງຄວາມຈາກຜູ້ເສຍຫາຍ ຢູ່ບ້ານສະພານທອງເໜືອ ເມືອງສີສັດຕະນາກ ໃນວັນທີ 10 ກຸມພາ 2021 ວ່າ: ໄດ້ມີຄົນຮ້າຍມາລັກເອົາລົດຈັກ ຮອນດ້າ ສະກຸບປີໄອ ສີຂາວ ໝາຍເລກທະບຽນ ດກ 5659 ຂອງຕົນ ຈອດໄວ້ໃນເຮືອນຫ້ອງແຖວ ຢູ່ບ້ານສະພານທອງເໜືອ ເມືອງສີສັດຕະນາກ.

    ຈາກນັ້ນ, ເຈົ້າໜ້າທີ່ ປກສ ເມືອງສີສັດຕະນາກ ຈິ່ງລົງກວດກາຊັນນະສູດເກັບຂໍ້ມູນຫຼັກຖານໃນສະຖານທີ່ເກີດເຫດ, ຕົກມາວັນທີ 17 ກຸມພາ 2021 ຈິ່ງພົບເຫັນລົດຈັກຄົນດັ່ງກ່າວ ຈອດຢູ່ຮ້ານອາຫານແຫ່ງໜື່ງ ເຂດບ້ານນາໄຊ ເມືອງໄຊເສດຖາ ເຈົ້າໜ້າທີ່ ປກສ ເມືອງສີສັດຕະນາກ ຈິ່ງສົມທົບກັບ ປກສ ເມືອງໄຊເສດຖາ ແລະ ອໍານາດການປົກຄອງບ້ານນາໄຊ ນໍາເອົາຕົວຜູ້ຂັບຂີ່ລົດຈັກ ຊື່ທ້າວ ແອ່ວ ອາຍຸ 23 ປີ ກໍາມະກອນ ຢູ່ບ້ານດົງໂພສີ ເມືອງຫາດຊາຍຟອງ ມາສືບສວນ-ສອບສວນຂະຫຍາຍຜົນໄດ້ກຸ່ມແກ້ງຜູ້ຮ່ວມຂະບວນອີກ 7 ຄົນ ຄື:

    ທ້າວ ເພັດສະໝອນ ຫຼື ໂຈ້ ອາຍຸ 27 ປີ, ທ້າວ ແອນ້ອຍ ຫຼື ແປ ອາຍຸ 27 ປີ, ທ້າວ ສົມພົງ ອາຍຸ 23 ປີ ທັງສາມຄົນເປັນກໍາມະກອນ ຢູ່ບ້ານທົ່ງສ້າງນາງ ເມືອງຈັນທະບູລີ; ທ້າວ ວັນພະພອນ ອາຍຸ 28 ປີ ກໍາມະກອນ ຢູ່ບ້ານໜອງທາເໜືອ, ທ້າວ ພາລິວັນ ຫຼື ເປດ ອາຍຸ 33 ປີ ກໍາມະກອນ ຢູ່ບ້ານໂພນທອງ ເມືອງຫີນເຫີບ ແຂວງວຽງຈັນ ປັດຈຸບັນພັກເຊົາ ຢູ່ບ້ານດົງປາແຫຼບ ເມືອງຈັນທະບູລີ ແລະ ທ້າວ ອານຸລັກ ຫຼື ລ໋ອກກີ້ ອາຍຸ 24 ປີ ກໍາມະກອນ ຢູ່ບ້ານຕານມີໄຊ ເມືອງໄຊທານີ; ພ້ອມຢຶດລົດຈັກໄດ້ອີກ ຈໍານວນ 11 ຄັນ ຄື: ລົດຈັກ ເວບ 100 ຈໍານວນ 5 ຄັນ, ຊູເມີເອັກ ສີດໍາ 2 ຄັນ, ຄິກໄອ ສີແດງ 1 ຄັນ, ຟີໂນ້ ສີແດງ 1 ຄັນ, ເອັມເອັດເອັກ ສີແດງ 1 ຄັນ ແລະ ພີຊີເອັກ ສີຂາວແດງ 1 ຄັນ ມາເປັນຂອງກາງໃນການດໍາເນີນຄະດີ.

    ໃນໂອກາດນີ້, ພັທ ອິນປັນ ຫາດາວເຮືອງ ໄດ້ຮຽກຮ້ອງມາຍັງປະຊາຊົນ, ຊາວຄ້າຂາຍ, ນັກຮຽນ-ນັກສຶກສາ ແລະ ຜູ້ປະກອບການຕ່າງໆ ໃຫ້ມີສະຕິລັງວັງຕົວໃນການຮັກສາຊັບສິນຂອງຕົນ ເປັນຕົ້ນແມ່ນ ລົດຈັກ ໃຫ້ຈອດໄວ້ບ່ອນທີ່ມີຄວາມປອດໄພ; ພ້ອມທັງເປັນຫູເປັນຕາຊ່ວຍເຈົ້າໜ້າທີ່ ຖ້າພົບເຫັນເຫດການບໍ່ດີ ໃຫ້ຮີບຮ້ອນລາຍງານຕໍ່ເຈົ້າໜ້າທີ່ ເພື່ອແກ້ໄຂເຫດການໃຫ້ທັນເວລາ.