ທ່າແຕງ ເປີດຂະບວນການສັກວັກຊີນ ປ້ອງກັນໂຄວິດ ຮອບທີ 1

    0
    325

    ແຫລ່ງຂ່າວຈາກແຂວງເຊກອງ ໃຫ້ຮູ້ວ່າ: ວັນທີ 11 ມີນາ 2021 ຢູ່ໂຮງໝໍຊຸມຊົນ ເມືອງທ່າແຕງ ແຂວງເຊກອງ ໄດ້ເປີດຂະບວນການສັກຢາວັກຊິນປ້ອງກັນພະຍາດໂຄວິດ-19 ເຂັມທໍາອິດ ໃຫ້ກຸ່ມທີ່ມີຄວາມສ່ຽງສູງ ຮອບທີ 1 ໂດຍມີ ທ່ານ ສົມເພັດ ເອີດລັດດາ ເຈົ້າເມືອງທ່າແຕງ, ມີພະນັກງານແພດໝໍ, ບຸກຄະລາກອນທີ່ມີຄວາມສ່ຽງ,

    ພະນັກງານທີ່ເຮັດວຽກຢູ່ດ່ານເຂົ້າ-ອອກເມືອງ,ພະນັກງານອໍານວຍຄວາມສະດວກຢູ່ຈຸດຈໍາກັດບໍລິເວນ ເຂົ້າຮ່ວມ. ທ່ານ ກໍລະກັນ ບຸດສະບາ ຫົວໜ້າຫ້ອງການສາທາລະນະສຸກເມືອງທ່າແຕງ, ຮອງປະທານຄະນະສະເພາະກິດໄດ້ໃຫ້ຮູ້ວ່າ: ການສັກວັກຊີນປ້ອງກັນພະຍາດໂຄວິດ-19 ແມ່ນເລັ່ງໃສ່ກຸ່ມເປົ້າໝາຍ 450 ຄົນເຊັ່ນ: ບຸກຄະລາກອນທີ່ເປັນ

    ກຸ່ມສ່ຽງທີ່ຈະໄດ້ຮັບວັກຊີນ ປ້ອງກັນພະຍາດໂຄວິດ-19 ເຂັມທໍາອິດ ຄັ້ງນີ້ປະກອບມີ: ຄະນະນໍາຂອງເມືອງ, ພະນັກງານພະນັກງານແພດ-ໝໍ, ບັນດາຜູ້ໃຫ້ບໍລິການນັກທ່ອງທ່ຽວ, ເຈົ້າຂອງເຮືອນພັກ, ໂຮງແຮມ, ກຸ່ມຄົນທີ່ປະຕິບັດໜ້າທີ່ຕາມຈຸດຜ່ານດ່ານເຂົ້າ-ອອກເມືອງ ແລະ ຈະເລີ່ມຈັດຕັ້ງປະຕິບັດ ສັກວັກຊີນໃນວັນທີ 11-15 ມີນາ

    ເປັນຕົ້ນໄປ ແລະ ພາກ ສ່ວນອື່ນໆຕາມລໍາດັບ ທີ່ຈະໄດ້ຮັບວັກຊິນໂຄວິດ-19. ສ່ວນຮອບທີ 2 ແມ່ນຈະໄດ້ສັກໃນວັນທີ 4-8 ເມສາທີ່ຈະມາເຖິງນີ້. ສະເພາະເມືອງທ່າແຕງ ໄດ້ຮັບວັກຊີນກັນພະຍາດໂຄວິດ-19 ທັງໝົດ 900 ໂດສ.