ເຈົ້າແຂວງໄຊຍະບູລີ ລົງກວດກາສະຖານທີ່ກໍ່ສ້າງ ໂຮງງານແປຮູບຢາງພະລາທີ່ເມືອງ ຊຽງຮ່ອນ

    0
    198

    ແຫລ່ງຂ່າວຈາກ ແຂວງໄຊຍະບູລີ ໃຫ້ຮູ້ວ່າ: ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ໄດ້ລົງກວດກາຈຸດທີ່ຈະກໍ່ສ້າງ ໂຮງງານແປຮູບຢາງພະລາ ທີ່ເມືອງຊຽງຮ່ອນ ໃນວັນທີ 10 ມີນາ 2021 ໂດຍໃຫ້ການຕ້ອນຮັບ ແລະ ນໍາພາລົງເບິ່ງສະຖານທີ່ຕົວຈິງ ໂດຍອໍານາດການປົກຄອງເມືອງຊຽງຮ່ອນ. ເພື່ອເບິ່ງຄວາມເໝາະສົມຂອງສະຖານທີ່ຕົວຈິງທີ່ຈະກໍ່ສ້າງໂຮງງານແປຮູບຢາງພະລາ ຂອງນັກລົງທຶນຈາກ ສປ ຈີນ, ເຊິ່ງສະຖານທີ່ດັ່ງກ່າວແມ່ນຕັ້ງຢູ່ ບ້ານ ຄິ່ງ ເມືອງຊຽງຮ່ອນ ຫ່າງຈາກບ້ານ

    ປະມານ 2 ກິໂລແມັດ, ມີເນື້ອທີ່ 7,8 ເຮັກຕາ, ເປັນດິນຂອງລັດຄຸ້ມຄອງ ແລະ ຜ່ານການລົງກວດກາເບິ່ງຕົວຈິງ ເຫັນວ່າສະຖານທີ່ດັ່ງກ່າວ ມີຄວາມເໝາະສົມໃນການສ້າງຕັ້ງໂຮງງານແປຮູບຢາງພະລາໂອກາດດັ່ງກ່າວ, ທ່ານ ພົງສະຫວັນ ສິດທະວົງ ກໍໄດ້ຮຽກຮ້ອງໃຫ້ນັກລົງທຶນຈາກ ສປ ຈີນ ທີ່ຈະມາລົງທຶນສ້າງໂຮງງານນັ້ນ ຈົ່ງຮີບຮ້ອນປະກອບເອກະສານໃຫ້ພາກສ່ວນທີ່ກ່ຽວຂ້ອງໂດຍໄວ, ການສ້າງໂຮງງານຕ້ອງເຮັດໃຫ້ໄດ້ມາດຖານ, ຮັບປະກັນຄວາມປວດໄພຮອບດ້ານ, ບໍ່ໃຫ້ແຕະຕ້ອງຜົນເສຍຫາຍຕ່າງຂອງ

    ປະຊາຊົນ ແລະ ສິ່ງແວດລ້ອມເປັນຕົ້ນແມ່ນ ການສົ່ງກິນເໝັນ, ຕ້ອງໄດ້ຂຸດຂຸມເພື່ອບໍາບັດນໍ້າເສຍໃຫ້ສະອາດກ່ອນຈະປ່ອຍລົງແມ່ນໍ້າ, ພ້ອມດຽວກັນກໍຕ້ອງສົ່ງເສີມປະຊາຊົນປູກຢາງເພີ່ມ ແລະ ເກັບຊື້ນໍາປະຊາຊົນໃນລາຄາທີ່ເໝາະສົມ, ບໍ່ໃຫ້ເອົາລັດເອົາປຽບເຊິ່ງກັນ ແລະ ກັນ. ປັດຈຸບັນ ທົ່ວເມືອງຊຽງຮ່ອນ ມີເນື້ອທີ່ປູກຢາງພະລາເກືອບ

    5 ພັນເຮັກຕາ, ໃນນັ້ນ ສາມາດຂີດຢາງໄດ້ແລ້ວ 3.560 ເຮັກຕາ ແລະ ປູກໃໝ່ໃນປີ 2020-2021 ນີ້ 220 ເຮັກຕາ.ຈາກນັ້ນທີມງານຂອງທ່ານເຈົ້າແຂວງ ກໍໄດ້ລົງກວດກາເບິ່ງໂຄງການກໍ່ສ້າງນໍ້າປະປາຊຸມຊົມ ເຂດຈຸດສຸມທົ່ງກາບເມືອງຊຽງຮ່ອນ, ເບິ່ງໂຄງການກໍ່ສ້າງ ແລະ ຍົກຍ້າຍບ້ານຈັດສັນ ບ້ານກິ່ວງິ້ວ ເມືອງເງິນ ແລະ ເບິ່ງໂຄງການກໍ່ສ້າງໂຮງງານຜະລິດຍີບຊໍາ ຢູ່ເມືອງຫົງສາ ຕື່ມອີກ.

    ຂ່າວ-ພາບ: ອຸ່ນເຮືອນ ໂພທິລັກ