ພະແນກສາທາແຂວງສະຫວັນນະເຂດ ກວດພົບຜູ້ຕິດເຊື້ອໂຄວິດ 1 ຄົນ ມາຈາກປະເທດໄທ

    0
    182

    ໃນວັນທີ 10 ມີນາ 2021​ ພະແນກສາທາລະນະສຸກ ແຂວງສະຫວັນນະເຂດ ໄດ້ອອກບົດລາຍງານຜົນກວດພົບເຊື້ອພະຍາດໂຄວິດ-19 ທີ່ສູນກັກກັນຫຼັກ 4 ແຂວງສະຫວັນນະເຂດ ໂດຍໄດ້ລາຍງານວ່າ: ໃນເວລາ 18:30 ໂມງ ຂອງວັນທີ 9 ມີນາ 2021 ຫ້ອງວິເຄາະໂຮງໝໍແຂວງໄດ້ລາຍງານການກວດຕົວຢ່າງຊອກເຊື້ອໂຄວິດ-19 ຂອງແຮງງານທີ່ກັບມາຈາກປະເທດໄທມີທັງໝົດ ຈໍານວນ 171 ຕົວຢ່າງ, ໃນນີ້ໄດ້ກວດພົບເຊື້ອມີຜົນບວກ (+) ຈຳນວນ 1 ຄົນ ໂດຍມີຂໍ້ມູນດັ່ງນີ້: ຊື່ ທ, ໄໝ ອາຍຸ 41 ປີ

    ສັນຊາດລາວ, ອາຊີບຄ້າຂາຍຜັກຕະລາດສົດ ຢູ່ຈັງຫວັດປະທຸມທານີ ປະເທດໄທ. ປະຫວັດການເດີນທາງ: ຜູ້ກ່ຽວໄດ້ເດີນທາງເຂົ້າມາ ແຂວງສະຫວັນນະເຂຕ ໂດຍຜ່ານດ່ານສາກົນຂົວມິດຕະພາບລາວ-ໄທ II ໃນວັນທີ 4 ມີນາ 2021 ໄດ້ຖືກຈັດສົ່ງໄປສູນກັກກັນຫຼັກ 4 ດ້ວຍລົດຂອງສູນ. ໃນມື້ເດີນທາງເຂົ້າມາຜູ້ກ່ຽວບໍ່ມີອາການໄຂ້ ແລະ ບໍ່ມີອາການສະແດງທີ່ສົງໃສກ່ຽວກັບພະຍາດໂຄວິດ-19,​ ໄດ້ເກັບຕົວຢ່າງໃນວັນທີ 7 ມີນາ, ໄດ້ກວດເຊື້ອຢູ່ຫ້ອງວິເຄາະໃນວັນທີ 9 ມີນາ ແລະ ຮູ້ຜົນກວດໃນເວລາ 10:30

    ໂມງ.ຕໍ່ສະພາບການດັ່ງກ່າວ ທາງພະແນກສາທາລະນະສຸກແຂວງໄດ້ເອົາຕົວຜູ້ກ່ຽວກັກກັນໄວ້ທີ່ຫ້ອງປິ່ນປົວຢູ່ໂຮງໝໍແຂວງ, ທີມງານສອບສວນພະບາດໄດ້ລົງເອົາຂໍ້ມູນ ລະອຽດຂອງຜູ້ພົບເຊື້ອ ແລະ ກຸ່ມຜູ້ສໍາພັດໃກ້ຊິດ ຊຶ່ງລວມມີແຮງງງານໃນສູນ, ພະນັກງານເຈົ້າໜ້າທີ່ໃນສູນ, ຜູ້ຂາຍເຄື່ອງ ແລະ ເຈົ້າໜ້າທີ່ທຸກພາກສ່ວນໃນຕ່ານ ຈົ່ງເບື້ອງຕົ້ນລວມມີ 36 ຄົນ.​ ໃນນັ້ນ,​ ມີເຈົ້າໜ້າທີ່ພະນັກງານ ແລະ ແຮງງານໃນສູນ ທັງໝົດ 36 ຄົນ, ພວກກ່ຽວທັງໝົດແມ່ນໄດ້ຖືກເກັບ ແລະ ກວດຕົວຢ່າງຊອກເຊື້ອ

    ໃນວັນທີ 10 ມີນາ 2021 (ຊຶ່ງຈະຮູ້ຜົນໃນເວລາ 10 ໂມງ). ພ້ອມນີ້ໄດ້ເຂັ້ມ່ງວດປະຕິບັດມາດຕະການປ້ອງກັນການສົ່ງເຊື້ອພາຍໃນສູນກັກກັນ, ການຢູ່ຫ່າງກັນ, ການຕິດຕາມອາການປະຈໍາວັນຂອງແຕ່ລະຄົນ, ມາດຕະການຂ້າເຊື້ອໃນສູນ, ຫ້ອງພັກ, ຫ້ອງນ້ຳ ແລະ ອື່ນໆ, ບໍ່ອະນຸຍາດໃຫ້ຂາຍເຄື່ອງອຸປະໂພກ-ບໍລິໂພກໃນສູນ ແລະ ໄດ້ແນະນຳແພດໃຫ້ຄວາມຮູ້ແກ່ຜູ້ກັກກັນກ່ຽວກັບການປ້ອງກັນຕ່າງໆ. ສ່ວນຜູ້ຕິດເຊື້ອ ໃນປັດຈຸບັນຜູ້ກ່ຽວບໍ່ມີອາການສະແດງການເຈັບເປັນໃດໆ ຈຶ່ງໄດ້ກັກຕົວຕິດຕາມ, ປິ່ນປົວຕາມອາການທີ່ພົບ ແລະ ຈະໄດ້ກວດເຊື້ອໃນແຕ່ລະໄລຍະ. ປັດຈຸບັນແມ່ນກໍາລັງລໍຖ້າຕະນະສະເພາະກິດສູນກາງເປັນຜູ້ຖະແຫຼງການພົບເຊື້ອ.