ເມືອງໄຊພູທອງ ເປີດບຸນນະມັດສະການຜາສາດເຮືອນຫີນ ປະຈໍາປີ 2021

    0
    123

    ແຫລ່ງຂ່າວຈາກເມືອງໄຊພູທອງ ໃຫ້ຮູ້ວ່າ: ເມືອງໄຊພູທອງ ແຂວງສະຫວັນນະເຂດ ເປີດບຸນນະມັດສະການຜາສາດເຮືອນຫີນ ປະຈໍາປີ 2021 ຢ່ງເປັນທາງການ ໃນວັນທີ 24 ກຸມພາ ຜ່ານມາຢູ່ເດີ່ນວັດບ້ານເຮືອນຫີນ ໂດຍມີ ທ່ານ ຫ່ວນ ຮັງບົວສອນ ຮອງເລຂາພັກເມືອງ, ຜູ້ຊີ້ນໍາວຽກງານການ ເມືອງແນວຄິດ-ພັກພະນັກງານ, ມີຄະນະປະຈໍາພັກເມືອງ-ກໍາມະການພັກເມືອງ, ຫົວຫ້ອງການ, ອົງການຈັດຕັ້ງບ້ານ, ອົງການຈັດຕັ້ງມະຫາຊົນ, ຕະຫລອດເຖິງປະຊາຊົນຜູ້ມາທ່ຽວງານບຸນເຂົ້າຮ່ວມ. ທັງນີ້ ກໍເພື່ອເປັນການສືືບສານຮີດຄອງປະເພນີອັນດີງາມ ທີ່ປະຕິບັດມາແຕ່ບູຮານນະການ.ທ່ານ ອຸດອນ ບຸດຕະນະວົງ ຫົວໜ້າຫ້ອງການຖະແຫລງຂ່າວ-ວັດທະນະທໍາ ແລະ ທອງທ່ຽວ ເມືອງ

    ໄດ້ກ່າວໃນພິທີເປີດງານຄັ້ງນີ້ວ່າ: ໃນແຕ່ລະປີພໍຮອດເດືອນ 4 ເພັງ ປະຊາຊົນພາຍໃນທ້ອງຖິ່ນໂດຍສະເພາະ ຊາວເມືອງໄຊພູທອງ ກໍຄື ຊາວພຸດທະບໍລິສັດທັງຫລາຍ ທີ່ມີຄວາມເຫລື້ອມໃສ, ມີຈິດໃຈໃສສັດທາ ກໍໄດ້ພ້ອມກັນຈັດບຸນສະເຫລີມສະຫລອງຜາສາດຫີນແຫ່ງນີ້ ເປັນປົກກະຕິຕະຫລອດມາ ເພື່ອເປັນການສັກກາລະບູຊາສິ່ງສັກສິດໃນສະຖານທີ່ແຫ່ງນີ້, ເປັນການຈົດຈຳລໍ້າລຶກເຖິງຄຸນງາມຄວາມດີຂອງບັນພະບຸລຸດທີ່ໄດ້ສ້າງປັດຕິຍະກໍາອັນລໍ້າເລີດນີ້ຂຶ້ນມາ ແລະ ຖືເອົາສະຖານທີ່ແຫ່ງນີ້ເປັນສູນລວມທາງດ້ານ

    ຈິດໃຈ ແລະ ເຕົ້າໂຮມຄວາມສາມັກຄີ ປະຊາຊົນບັນດາເຜົ່າ ແລະ ເປັນບ່ອນແລກປ່ຽນຊື້-ຂາຍຜົນຜະລິດ ກະສິກໍາ, ຫັດຖະກໍາ ສ້າງເງື່ອນໄຂໃຫ້ແກ່ປະຊາຊົນບັນດາເຜົ່າໄດ້ສະແດງອອກ ເຊິ່ງຄວາມເບີກບານມ່ວນຊື່ນ, ພົບປະສ້າງສັນດ້ວຍກິດຈະກໍາແຂ່ງຂັນກິລາ, ສິລະປະວັນນະຄະດີ ປະເພດຕ່າງໆຕາມວິຖີຊີວິດຂອງປະຊາຊົນ.ຜາສາດເຮືອນຫີນ ຖືວ່າເປັນສະຖາປັດຕິຍະກໍາທີ່ໂດດເດັ່ນລໍ້າຄ່າ, ເຊິ່ງບົ່ງບອກເຖິງຄວາມ ເກັ່ງກ້າສາມາດສະຫລາດຫລັກແຫລມ ແລະ ມີຫົວຄິດປະດິດສ້າງຂອງປະຊາຊົນລາວບັນດາເຜົ່າໃນສະໄໝບູຮານ ແລະ ຍັງເປັນຕົວຊີ້ວັດໃຫ້ແກ່ຮຸ່ນຄົນພວກເຮົາ ເຫັນໄດ້ນັບແຕ່ສະໄໝບູຮານເປັນຕົ້ນມາ ລາວເຮົາກໍເປັນຊາດໜຶ່ງທີ່ມີຄວາມຈະເລີນຮຸ່ງເຮືອງ ແລະ ສີວິໄລທາງ

    ດ້ານອະລິຍະທໍາ ເຊິ່ງບັນພະບຸລຸດລາວແຕ່ລະຍຸກແຕ່ລະສະໄໝ ໄດ້ປົກປັກຮັກສາ ແລະ ສ້າງສາພັດທະນາມາ ໂດຍ ບໍ່ໄດ້ໜ້ອຍໜ້າຊາດອື່ນໃດໃນໂລກ, ແຕ່ເນື່ອງຈາກວ່າ ເວລາຜ່ານພົ້ນໄປນັບເປັນພັນປີ ແລະ ໂລກຂອງເຮົາກໍ່ມີການເຄື່ອນໝູນໄປຢ່າງບໍ່ຢຸດຢັ້ງ ອັນເປັນເຫດໃຫ້ສິ່ງກໍ່ສ້າງເຫລົ່ານີ້ ມີການຊຸດໂຊມ, ແຕ່ເຖິງຢ່າງໃດກໍຕາມ ສີໄມ້ລາຍມືອັນປານີດໂດດເດັ່ນຂອງຄົນລາວບູຮານ ກໍຍັງຕັ້ງປະດິດສະຖານໄວ້ຢ່າງໝັ້ນຄົງ ແລະ ສັກສິດມາເຖິງທຸກວັນນີ້. ຜາສາດເຮືອນຫີນແຫ່ງນີ້ຖືວ່າ ເປັນແຫ່ງທີ 2 ຂອງປະເທດລາວ ຖັດຈາກວັດພູຈໍາປາສັກ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.