ເຈົ້າໜ້າທີ່ ສູນຈຳກັດບໍລິເວນທົ່ວປະເທດ ຕ້ອງຍົກສູງຄວາມຮັບຜິດຊອບການເຝົ້າລະວັງ ຕິດຕາມ ຜູ້ທີ່ເຂົ້າມາຈຳກັດບໍລິເວນ

    0
    132

    ໃນພິທີຖະແຫລງຂ່າວ ຂອງ ທ່ານ ດຣ.ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ໃນວັນທີ 25 ກຸມພາ 2021, ໄດ້ຮຽກ ຮ້ອງມາຍັງ ເຈົ້າໜ້າທີ່ຜູ້ຮັບຊອບ ທີ່ປະຕິບັດວຽກງານຢູ່ສູນຈຳກັດບໍລິເວນ ທີ່ຖືກກຳນົດໄວ້ໃນຂອບເຂດທົ່ວປະເທດ ເອົາໃຈໃສ່ຍົກສູງສະຕິຄວາມຮັບຜິດຊອບ ແລະ ເປັນຫູເປັນຕາຊ່ວຍກັນ ໃນການເຝົ້າລະວັງ, ຕິດຕາມຜູ້ທີ່ເຂົ້າມາ

    ຈຳກັດບໍລິເວນ ຮັບປະກັນໃຫ້ພວກກ່ຽວ ປະຕິບັດໃຫ້ຄົບກຳນົດ 14 ວັນ ຕາມຄໍາແນະນໍາທີ່ຄະນະສະເພາະກິດວາງອອກ ຢ່າງເຂັ້ມງວດ. ຖ້າຫາກທ່ານພົບເຫັນວ່າ ມີຜູ້ລັກລອບອອກຈາກສູນ ໃຫ້ລາຍງານຕໍ່ເຈົ້າໜ້າທີ່ກ່ຽວຂ້ອງທັນທີ ເພື່ອຈະໄດ້ຕິດຕາມພວກກ່ຽວ ໃຫ້ກັບຄືນມາຈຳກັດບໍລິເວນ, ຕິດຕາມຜູ້ສຳຜັດໃກ້ຊິດ ແລະ ເກັບຕົວຢ່າງກໍລະນີສົງໄສ ມາກວດຊອກຫາເຊື້ອ. ພ້ອມກັນນີ້, ໄດ້ຮຽກຮ້ອງມາຍັງອຳນາດການປົກຄອງທ້ອງຖິ່ນທຸກຂັ້ນ ຖ້າຫາກທ່ານພົບເຫັນ ມີຜູ້ລັກລອບເຂົ້າມາປະເທດຂອງພວກເຮົາ ໂດຍບໍ່

    ຖືກລະບຽບກົດໝາຍໃຫ້ລາຍງານ ຫລື ແຈ້ງພາກສ່ວນກ່ຽວຂ້ອງຮັບຊາບທັນທີ ເພື່ອດຳເນີນການ ແລະ ເກັບຕົວຢ່າງພວກກ່ຽວມາກວດຢ່າງທັນການ.ເນື່ອງຈາກວ່າປັດຈຸບັນ, ປະເທດເພື່ອນບ້ານຂອງພວກເຮົາ ກຳລັງມີການລະບາດໃໝ່ເກີດຂຶ້ນ ເປັນຍ້ອນມີກຸ່ມຄົນຈຳນວນໜຶ່ງ ທີ່ເດີນທາງເຂົ້າມາປະເທດດັ່ງກ່າວ ບໍ່ປະຕິບັດມາດຕະການ ໃນການຈຳກັດບໍລິເວນຕົນເອງໃຫ້ຄົບກຳນົດ 14 ວັນ ຢ່າງເຄັ່ງຄັດ ແຕ່ພວກກ່ຽວໄດ້ລັກລອບອອກຈາກສູນຈໍາກັດບໍລິເວນທີ່ຖືກກຳນົດໄວ້, ພ້ອມດຽວກັນນັ້ນ ພວກກ່ຽວ ຍັງໄດ້ໄປ

    ສະຖານທີ່ບັນເທິງ ເຊິ່ງເປັນບ່ອນທີ່ມີຄົນແອອັດ ແລະ ສະຖານທີ່ຕ່າງໆຫລາຍແຫ່ງ ພາຍໃນຕົວເມືອງນຳອີກ ສົ່ງຜົນໃຫ້ການຕິດເຊື້ອຂະຫຍາຍເປັນວົງກວ້າງ. ສະນັ້ນ, ຈຶ່ງຂໍການຮ່ວມມືນຳພໍ່ແມ່, ປະຊາຊົນ ແລະ ທຸກພາກສ່ວນໃນສັງຄົມ ຮ່ວມແຮງຮ່ວມໃຈກັນ ປະຕິບັດມາດຕະການ ຕາມຄຳແນະນຳ ຂອງຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດ, ຮັບປະກັນໃຫ້ທຸກຄົນທີ່ເດີນທາງເຂົ້າມາ ສປປ ລາວ ໄດ້ຮັບການເກັບຕົວຢ່າງ ກວດຊອກຫາເຊື້ອພະຍາດໂຄວີດ-19 ແລະ ໄດ້ຈໍາກັດບໍລິເວນ ຄົບ 14 ວັນ ຕາມມາດຕະການທີ່ໄດ້ກຳນົດໄວ້ ເພື່ອສະກັດກັ້ນການລະບາດ ແລະ ຫລຸດຜ່ອນຄວາມສ່ຽງ ທີ່ຈະມີການນຳພະ ຍາດໂຄວິດ-19 ເຂົ້າມາແຜ່ລະບາດໃນປະເທດເຮົາຮອບໃໝ່.

    ທ່ານ ດຣ.ສີສະຫວາດ ສຸດທານີລະໄຊ ກ່າວຕື່ມວ່າ: ສຳລັບການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 24 ກຸມພາ 2021 ໄດ້ເກັບຕົວຢ່າງມາກວດວິເຄາະທັງໝົດ 393 ຄົນ, ຜົນກວດວິເຄາະທັງໝົດແມ່ນບໍ່ພົບເຊື້ອ ໝາຍຄວາມວ່າ ວັນທີ 24 ກຸມພາ 2021 ບໍ່ພົບຜູ້ຕິດເຊື້ອໃໝ່. ສັງລວມການກວດວິເຄາະ ນັບແຕ່ເດືອນມັງກອນ 2020 ຮອດປະຈຸບັນ ໄດ້ເກັບຕົວຢ່າງມາກວດທັງໝົດ 112.150 ຕົວຢ່າງ, ກວດພົບເຊື້ອສະສົມ 45 ຄົນ. ມາຮອດປັດຈຸບັນ ຄົນເຈັບຕິດ ເຊື້ອພະຍາດໂຄວິດ-19 ຍັງ 3 ຄົນ ນອນຕິດຕາມອາການ ແລະ ປິ່ນປົວຢູ່ໂຮງໝໍທີ່ຖືກກຳນົດໄວ້.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.