ກົມໂຄສະນາ ຄະນະໂຄສະນາອົບຮົມສູນກາງພັກ ລົງຢ້ຽມຢາມໂຄງການທາງລົດໄຟ ລາວ-ຈີນ

    0
    102

    ໃນວັນທີ 24 ກຸມພາ 2021 ນຳໂດຍທ່ານ ນ. ບົວລີ ບັນຊາລິດ ຄະນະພັກ, ຫົວໜ້າກົມໂຄສະນາ, ຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ ຈຳນວນທັງໝົດ 35 ທ່ານ, ຍິງ 15 ທ່ານ ລົງຢ້ຽມຢາມທັດສະນະສຶກສາໂຄງການທາງລົດໄຟລາວ-ຈີນ ຢູ່ທີ່ສະຖານີໂດຍສານລົດໄຟ ລາວ-ຈີນນະຄອນຫລວງວຽງຈັນ (ຫລັກ 15).ໃນການຢ້ຽມຢາມຄັ້ງນີ້ ທ່ານ ຊ່ຽວ ຊຽນເຫວີນ (XIAO QIAN WEN), ຜູ້ອຳນວຍການໃຫຍ່ບໍລິສັດລົດໄຟ ລາວ-ຈີນຈໍາກັດ ພ້ອມດ້ວຍຄະນະບໍລິຫານງານ ໄດ້ຕ້ອນຮັບຄະນະ ແລະ

    ນໍາສະເໜີວຽກງານການປະກອບລົດໄຟ, ໂຄງຮ່າງສະຖານີໂດຍສານ, ສະຖານີເຄື່ອງຂົນສົ່ງ, ການອອກແບບໃຫ້ມີສັນຍາລັກມິດຕະພາບ ລາວ-ຈີນ, ວຽກງານການພັດທະນາຊຸມຊົນ ແລະ ການບໍລິຫານສິ່ງແວດລ້ວມ ໃຫ້ຄະນະໄດ້ຮັບຊາບ. ຫລັງຈາກນັ້ນ ຄະນະໄດ້ຢ້ຽມຊົມ ແລະ ຂີ່ລົດໄຟຈາກສະຖານີໂດຍສານລົດໄຟ ລາວ-ຈີນ ນະຄອນຫລວງວຽງຈັນ (ຫລັກ 15) ໄປຍັງສະໝາມເຊລອມຕໍ່ທາງລົດໄຟ ເຂດບ້ານສົງເປືອຍ ເມືອງນາຊາຍທອງ, ນະຄອນຫລວງວຽງຈັນ.ໃນທີ່ປະຊຸມ ຝ່າຍຈີນ ຍັງໄດ້ໃຫ້ຊາບຕື່ມວ່າ:

    ການຂົນສົ່ງແມ່ນມີຄວາມສຳຄັນທີ່ສຸດຕໍ່ການພັດທະນາເສດຖະກິດ-ສັງຄົມ, ຖ້າມີການຂົນສົ່ງທີ່ມີປະສິດທິພາບສູງ ກໍຈະປະກອບສ່ວນເຮັດໃຫ້ເສດຖະກິດ ມີຄວາມເຕີບໂຕໄວ. ດັ່ງ ປະທານ ໄກສອນ ພົມວິຫານ ໄດ້ເວົ້າວ່າ “ການຄົມມະນາຄົມຂົນສົ່ງເປັນປາຍແຫລມຂອງເສດຖະກິດແຫ່ງຊາດ”. ດັ່ງສຸພາສິດຈີນ ໄດ້ກ່າວວ່າ “ຢາກຮັ່ງມີໃຫ້ສ້າງທາງກ່ອນ, ຖ້າຢາກລວຍໃຫ້ສ້າງທາງລົດໄຟ ເມື່ອມີສຽງດັງຂື້ນ ເງິນຄຳກໍໄຫລມາເທມາ”. ລົດໄຟ ເຮັດໃຫ້ລະບົບຂົນສົ່ງມີຄວາມປອດໄພສູງ, ມີຜົນກະທົບຕໍ່ສິ່ງແວດລ້ອມຕ່ຳ,

    ຫລຸດຜ່ອນຄວາມແອອັດໃນການສັນຈອນທາງຖະໜົນ, ຄ່າຂົນສົ່ງຖືກກວ່າ, ໄລຍະທາງການຂົນສົ່ງສັ້ນກວ່າ, ຂົນສົ່ງໄດ້ຈຳນວນຫລາຍ ແລະ ກົງຕໍ່ເວລາ. ເຫັນໄດ້ວ່າມີຫລາຍປະເທດນິຍົມຊົມໃຊ້ການພັດທະນາລະບົບການພັດທະນາການຂົນສົ່ງເພື່ອເປັນການຊຸກຍູ້ການພັດທະນາເສດຖະກິດ. ອີງໃສ່ການພັດທະນາເສດຖະກິດ-ສັງຄົມຂອງລາວ ການພົວພັນຮ່ວມມືພາກພື້ນ ແລະ ສາກົນ ທີ່ນັບມື້ນັບຂະຫຍາຍຕົວນັ້ນ, ສູນກາງພັກ ແລະ ລັດຖະບານລາວເຮົາ ຈຶ່ງໄດ້ມີນະໂຍບາຍຫັນປະເທດຈາກບໍ່ມີຊາຍແດນຕິດກັບທະເລ

    ໃຫ້ກາຍເປັນປະເທດເຊື່ອມຈອດກັບປະເທດໃກ້ຄຽງ, ອັນນີ້ແມ່ນຍຸດທະສາດທີ່ເຫັນກວ້າງມອງໄກຂອງພັກ ແລະ ລັດ, ທັງສອດຄ່ອງກັບວິວັດທະນາການແຫ່ງການພັດທະນາຂອງສັງຄົມມະນຸດ.ໂຄງການລົດໄຟ ລາວ-ຈີນ ເລີ່ມລົງມືກໍ່ສ້າງ ໃນວັນທີ 25 ທັນວາ 2016, ມີຄວາມຍາວທັງໝົດ 422.4 ກິໂລແມັດ, ສະເລ່ຍຄວາມໄວ 160-200 km/h, ໄລຍະເວລາກໍ່ສ້າງ 5 ປີ ຄາດວ່າທ້າຍປີ 2021 ຈະໄດ້ນຳໃຊ້ຢ່າງເປັນທາງການ, ມູນຄ່າຂອງໂຄງການ 37.4 ຕື້ຢວນ ຫລືປະມານ 6.000 ລ້ານໂດລາສະຫະລັດ,

    ຝ່າຍລາວ ຖືຮຸ້ນ 30%, ຝ່າຍຈີນ ຖືຮຸ້ນ 70%, ກຳນົດເອົາ 40% ຂອງມູນຄ່າການລົງທຶນ ເປັນເງິນຕົ້ນທຶນ, ສ່ວນອີກ 60% ແມ່ນກູ້ຢືມຈາກທະນາຄານຂາເຂົ້າ-ຂາອອກ ສປ ຈີນ ດ້ວຍດອກເບ້ຍນະໂຍບາຍ; ໃນມູນຄ່າ 5.986 ລ້ານໂດລາສະຫະລັດນັ້ນ, ລັດຖະບານລາວ ລົງທຶນ 730 ລ້ານໂດລາສະຫະລັດ ຫລື ເທົ່າກັບ 12% ຂອງມູນຄ່າໂຄງການ, ຊຶ່ງລັດຖະບານອອກເງິນຕົວຈິງ 250 ລ້ານໂດລາສະຫະລັດ ໃນໄລຍະເວລາ 5 ປີ (ປີລະ 50 ລ້ານໂດລາສະຫະລັດ) ແລະ ອີກຈໍານວນ 480 ລ້ານໂດລາສະຫະລັດ

    ແມ່ນລັດຖະບານຈີນ ໃຫ້ການກູ້ຢືມແບບພິເສດ.ຫລັງຈາກໂຄງການກໍ່ສ້າງທາງລົດໄຟ ລາວ-ຈີນ ສຳເລັດ ສປປ ລາວ ຈະໄດ້ຮັບຜົນປະໂຫຍດ ຄື:(1) ຈະມີພື້ນຖານໂຄງລ່າງທາງດ້ານເສດຖະກິດທີ່ໝັ້ນຄົງ; (2) ຈະບັນລຸຍຸດທະສາດການຮ່ວມມື ແລະ ການເຊື່ອມຈອດ ລະຫວ່າງ ສປປ ລາວ ກັບ ປະເທດອາຊຽນ ແລະ ສປ ຈີນ;(3) ທາງລົດໄຟຈະເປັນເຄື່ອງມືສຳຄັນໃນການດຶງດູດເອົານັກລົງທຶນຈາກຕ່າງປະເທດ, ຈະມີທ່າແຮງສົ່ງເສີມການພົວພັນຮ່ວມມືຄ້າຂາຍ, ແລກປ່ຽນສິນຄ້າ, ການໄປມາຫາສູ່, ການ

    ທ່ອງທ່ຽວ, ການລົງທຶນກັບປະເທດອາຊຽນ ແລະ ສປ ຈີນ;(4) ປະກອບສ່ວນອັນສຳຄັນເຂົ້າໃນວຽກງານຫລຸດຜ່ອນຄວາມທຸກຍາກ;(5) ຈະກາຍເປັນຊັບສິນ ແລະ ເປັນມໍລະດົກອັນລໍ້າຄ່າໃຫ້ແກ່ປະເທດຊາດພວກເຮົາ. ໃນຕອນທ້າຍພິທີ ທ່ານ ນ. ບົວລີ ບັນຊາລິດ ຄະນະພັກ, ຫົວໜ້າກົມໂຄສະນາ, ຄະນະໂຄສະນາອົບຮົມສູນກາງພັກ ໄດ້

    ສະແດງຄວາມຊົມເຊີຍຕໍ່ບໍລິສັດທີ່ໄດ້ຜ່ານຜ່າຄວາມຫຍຸ້ງຍາກຫລາຍປະການໃນການປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ, ເພື່ອເຮັດໃຫ້ໂຄງການສໍາເລັດໄດ້ໃນເດືອນທັນວາ 2021 ຕາມແຜນການທີ່ກໍານົດໄວ້. ໂຄງການກໍ່ສ້າງທາງລົດໄຟ ລາວ-ຈີນ ແມ່ນໂຄງການຮ່ວມມືຂອງສອງລັດຖະບານ, ໂຄງການກໍ່ສ້າງທາງລົດໄຟ ລາວ-ຈີນ ແມ່ນໂຄງການທີ່ມີຄວາມສໍາຄັນເປັນພິເສດ ມີຄວາມໝາຍທາງດ້ານປະຫວັດສາດ ແລະ ຍຸດທະສາດຂອງປະເທດເຮົາ ຊຶ່ງຈະເປັນພື້ນຖານໂຄງລ່າງທາງດ້ານເສດຖະກິດທີ່ຍືນຍົງ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.