ສປປ ລາວ ບໍ່ພົບຜູ້ຕິດເຊື້ອໂຄວິດເພີ່ມ

    0
    51

    ໃນວັນທີ 24 ກຸມພາ 2021 ຢູ່ກະຊວງສາທາລະນະສຸກ ທ່ານ ນາງ ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ລາຍງານໃຫ້ຮູ້ວ່າ: ໃນວັນທີ 23 ກຸມພາ ທີ່ຜ່ານມາ ການເຝົ້າລະວັງຮອດ 5 ໂມງແລງ ໄດ້ເກັບຕົວຢ່າງມາກວດວິເຄາະ ທັງໝົດ 259 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ, ບໍ່ພົບຜູ້ມີອາການເປັນໄຂ້ ແລະ ໄດ້ນຳສົ່ງໄປຫາສະຖານທີ່

    ຈຳກັດບໍລິເວນທີ່ກຳນົດໄວ້. ສັງລວມການກວດວິເຄາະ ນັບແຕ່ເດືອນມັງກອນ 2020 ຮອດ ປະຈຸບັນ ໄດ້ເກັບຕົວຢ່າງມາກວດທັງໝົດ 111.757 ຕົວຢ່າງ, ກວດພົບເຊື້ອສະສົມ 45 ຄົນ ແລະ ຄົນເຈັບທີ່ຕິດເຊື້ອພະຍາດ COVID-19 ຈໍານວນ 03 ຄົນ ແມ່ນສືບຕໍ່ ນອນຕິດຕາມອາການ ແລະ ປິ່ນປົວຢູ່ໂຮງໝໍທີ່ຖືກກຳນົດໄວ້. ປັດຈຸບັນ ທົ່ວປະເທດ ມີສູນຈໍາກັດບໍລິເວນທີ່ຍັງເປີດນຳໃຊ້ຢູ່ ທັງໝົດ 27 ສູນ, ມີຜູ້ຖືກຈຳກັດບໍລິເວນຢູ່ສູນ 2.335 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດ

    ເຊື້ອ.ທ່ານ ນາງ ລັດສະໝີ ວົງຄຳຊາວ ໄດ້ກ່າວວ່າ: ສະພາບການລະບາດຂອງພະຍາດ COVID-19 ໃນທົ່ວໂລກ ຍັງມີລາຍງານຜູ້ຕິດເຊື້ອໃໝ່ ເນື່ອງຈາກຫລາຍປະເທດມີການປິດປະເທດ ແລະ ປະຕິບັດມາດຕະການປ້ອງກັນການຕິດເຊື້ອຢ່າງເຄັ່ງຄັດ ແລະ ຕໍ່ເນື່ອງ. ສຳລັບປະເທດເພື່ອນບ້ານຂອງພວກເຮົາ ແມ່ນມີການລະບາດຮອບໃໝ່

    ເກີດຂຶ້ນ ພາຍໃນປະເທດ, ຕໍ່ກັບສະພາບການດັ່ງກ່າວ ຂໍຮຽກຮ້ອງໃຫ້ຜູ້ທີ່ເດີນທາງເຂົ້າມາ ສປປ ລາວ ໃຫ້ການຮ່ວມມື ໃນການຈຳກັດບໍລິເວນຕົນເອງ ຈົນຄົບກຳນົດ 14 ວັນ ລວມທັງຜູ້ປະກອບການ ກໍເຊັ່ນດຽວກັນ ໃຫ້ປະຕິບັດຕາມຄຳແນະນຳ ແລະ ມາດຕະການຂອງຄະນະສະເພາະກິດວາງອອກຢ່າງເຂັ້ມງວດ. ອີກເທື່ອໜຶ່ງ ຂໍຮຽກຮ້ອງມາຍັງ

    ທຸກພາກສ່ວນໃນສັງຄົມ ຈົ່ງຍົກສູງຄວາມຮັບຜິດ ຊອບ ແລະ ເປັນເຈົ້າການ ໃນການຈັດຕັ້ງປະຕິບັດມາດຕະການ ແລະ ແຈ້ງການຂອງຫ້ອງວ່າການສຳນັກ ງານນາຍົກລັດຖະມົນຕີ, ສະບັບເລກທີ 111/ຫສນຍ, ລົງວັນທີ 01 ກຸມພາ 2021 ແລະ ຄຳແນະນຳຂອງຂະແໜງການກ່ຽວຂ້ອງ, ພ້ອມດຽວກັນ ກໍ່ໃຫ້ເອົາໃຈໃສ່ປະຕິບັດມາດຕະການປ້ອງກັນການຕິດເຊື້ອ ຢ່າງຖືກຕ້ອງ ແລະ ເຂັ້ມງວດ ເພື່ອສະກັດກັ້ນ ແລະ ຫລຸດຜ່ອນການລະບາດຂອງພະຍາດດັ່ງກ່າວ ບໍ່ໃຫ້ຂະຫຍາຍອອກເປັນວົງກວ້າງ.

     

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.