ໃນປີທີ່ຜ່ານມາ ບໍລິຄໍາໄຊສົ່ງອອກສິນຄ້າລື່ນແຜນການ 21 ລ້ານກວ່າໂດລາສະຫະລັດ

    0
    118

    ປີ 2020 ຜ່ານມານີ້ ແຂວງບໍລິຄໍາໄຊ ສາມາດສົ່ງອອກສິນຄ້າເກີນແຜນການທີ່ວາງໄວ້ 21 ລ້ານກວ່າໂດລາສະຫະລັດ ໂດຍບັນລຸທັງໝົດ 78 ລ້ານກວ່າໂດລາສະຫະລັດ (ແຜນການ 56,88 ລ້ານໂດລາສະຫະລັດ). ຂະນະທີ່ການນໍາເຂົ້າສິນຄ້າບັນລຸ 311 ລ້ານກວ່າໂດລາສະຫະລັດ (ແຜນການ 367,97 ລ້ານໂດລາສະຫະລັດ) ເຮັດໃຫ້ຂາດດຸນການຄ້າທັງໝົດ 233 ລ້ານກວ່າໂດລາສະຫະລັດ. ໃນນີ້ ສະເພາະສິນຄ້າສົ່ງອອກຂອງແຂວງຕົ້ນຕໍແມ່ນມັນຕົ້ນ, ຢາງພາລາ, ເຄື່ອງໃຊ້ໄຟຟ້າ, ເສື່ອນອນ ແລະ ອື່ນໆ.

    ຫົວໜ້າພະແນກອຸດສາຫະກໍາ ແລະ ການຄ້າແຂວງບໍລິຄໍາໄຊ ໃຫ້ສໍາພາດວ່າ: ເມື່ອປຽບທຽບລະຫວ່າງມູນຄ່າການສົ່ງອອກ ແລະ ມູນຄ່າການນໍາເຂົ້າສິນຄ້າ ເຫັນວ່າແຂວງບໍລິຄໍາໄຊຍັງຂາດດຸນການຄ້າໃຫ້ຕ່າງປະເທດ ແຕ່ຖ້າຫາກເບິ່ງເລິກເຂົ້າໄປ ຕົວເລກການຂາດດຸນດັ່ງກ່າວແມ່ນມີເຫດມີຜົນ ເນື່ອງຈາກທາງແຂວງມີຄວາມຈໍາເປັນຕ້ອງນໍາເຂົ້າສິນຄ້າປະເພດທີ່ຈໍາເປັນ ແລະ ຂາດບໍ່ໄດ້ ໂດຍສະເພາະແມ່ນການນໍາເຂົ້ານໍ້າມັນເຊື້ອໄຟ ແລະ ເຄື່ອງຮັບໃຊ້ໂຄງການຕ່າງໆ. ສ່ວນການນໍາເຂົ້າສິນຄ້າເພື່ອມາບໍລິໂພກພາຍໃນມີມູນຄ່າໃກ້ຄຽງກັນກັບມູນຄ່າການສົ່ງອອກສິນຄ້າຂອງແຂວງ.

    ຫົວໜ້າພະແນກອຸດສາຫະກຳ ແລະ ການຄ້າແຂວງ ໃຫ້ຮູ້ຕື່ມວ່າ: ປັດຈຸບັນ ທົ່ວແຂວງມີໂຮງງານອຸດສາຫະກໍາ ແລະ ຫັດຖະກໍາທັງໝົດ 2.241 ໂຮງງານ, ໃນນີ້ ຂະໜາດນ້ອຍ 2.146 ໂຮງງານ, ຂະໜາດກາງ 46 ໂຮງງານ ແລະ ຂະໜາດໃຫຍ່ 49 ໂຮງງານ. ຈໍານວນໂຮງງານທັງໝົດນີ້ພົ້ນເດັ່ນກວ່າໝູ່ແມ່ນໂຮງງານຜະລິດໝໍ້ແປງໄຟຟ້າ,

    ໂຮງງານຜະລິດແປ້ງມັນຕົ້ນ, ໂຮງານປຸງແຕ່ງຢາງພາລາ ແລະ ໂຮງງານຜະລິດເສື່ອນອນ ໂດຍມີຕະຫລາດຈໍາໜ່າຍຕົ້ນຕໍຢູ່ຕ່າງປະເທດ. ນອກຈາກນີ້ ຍັງມີໂຮງງານອຸດສາຫະກໍາເຫລັກທີ່ສາມາດຕອບສະໜອງຄວາມຕ້ອງການພາຍໃນແຂວງໄດ້ພຽງພໍໂດຍພື້ນຖານ. ຫົວໜ່ວຍທຸລະກິດທັງໝົດນີ້ ນອກຈາກປະກອບສ່ວນສໍາຄັນເຮັດໃຫ້ຍອດມູນຄ່າສົ່ງອອກສິນຄ້າຂອງແຂວງບັນລຸຕາມແຜນການທີ່ວາງໄວ້ ຍັງປະກອບສ່ວນສໍາຄັນໃນການສ້າງວຽກເຮັດງານທໍາໃຫ້ປະຊາຊົນພາຍໃນແຂວງໄດ້ຈໍານວນຫລາຍສົມຄວນໃນແຕ່ລະປີ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.