ຄະນະສະເພາະກິດຢໍ້າ ໃຫ້ສັງຄົມປະຕິບັດ ມາດຕະການ ປ້ອງກັນໂຄວິດ ຢ່າງເຂັ້ມງວດ

    0
    98

    ໃນວັນທີ 16 ກຸມພາ 2021 ນີ້, ທ່ານ ດຣ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ພະຍາດໂຄວິດ-19 ໄດ້ກ່າວຢໍ້າໃຫ້ສັງຄົມເອົາໃຈໃສ່ປະຕິບັດມາດຕະການປ້ອງກັນພະຍາດ ໂຄວິດ-19 ຢ່າງເຂັ້ມງວດ, ພາຍຫລັງພົບວ່າການລະບາດຂອງພະຍາດດັ່ງກ່າວໃນຫລາຍປະເທດມີການກາຍພັນ, ເຮັດໃຫ້ເຊື້ອພະຍາດປ່ຽນໄປ ການແຜ່ເຊື້ອພະຍາດຈາກຄົນສູ່ຄົນງ່າຍຂຶ້ນ ແລະ ໄວກວ່າເກົ່າ. ມາຮອດ

    ວັນທີ 16 ກຸມພາ 2021, ທົ່ວໂລກມີການລະບາດຂອງພະຍາດ ໂຄວິດ-19 ທັງໝົດ 219 ປະເທດ/ເຂດ, ມີຜູ້ຕິດເຊື້ອສະສົມຫລາຍກວ່າ 109,6 ລ້ານຄົນ, ໃນນີ້ເສຍຊິວິດສະສົມຫລາຍກວ່າ 2,4 ລ້ານຄົນ ແລະ ປີ່ນປົວຫາຍດີກວ່າ 84,3 ລ້ານຄົນ. ສໍາລັບການເຝົ້າລະວັງ ໂຄວິດ-19 ຢູ່ ສປປ ລາວ ຮອດເວລາ 17:00 ໂມງຂອງວັນທີ 15 ກຸມພາ 2021, ທົ່ວປະເທດມີຜູ້ເດີນທາງມາທັງໝົດ 1.291 ຄົນ. ໃນນັ້ນ, ຜ່ານດ່ານ ລາວ-ໄທ 1.021 ຄົນ, ດ່ານລາວ-ຈີນ 29 ຄົນ, ດ່ານລາວ-ຫວຽດນາມ

    240 ຄົນ ແລະ ຜ່ານດ່ານລາວ-ກຳປູເຈຍ 1 ຄົນ. ທຸກຄົນໄດ້ແທກອຸນຫະພູມຮ່າງກາຍ, ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກຄົນມາກວດ ແລະ ນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ. ປັດຈຸບັນ, ມີຜູ້ຖືກກັກບໍລິເວນທັງໝົດ 2.757 ຄົນຢູ່ໃນ 35 ສູນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ ແລະ ໃນວັນທີ 15 ກຸມພາ 2021 ໄດ້ເກັບຕົວຢ່າງມາກວດວິເຄາະທັງໝົດ 116 ຄົນ, ຜົນກວດວິເຄາະທັງໝົດແມ່ນບໍ່ພົບເຊື້ອ

    ໝາຍຄວາມວ່າວັນທີ 15 ກຸມພາ 2021 ບໍ່ພົບຜູ້ຕິດເຊື້ອໃໝ່ ແລະ ຕົວເລກຜູ້ຕິດເຊື້ອສະສົມຢູ່ປະເທດເຮົາທັງໝົດ 45 ຄົນ. ໃນນີ້ ປິ່ນປົວຫາຍດີ 41 ຄົນ ແລະ ຍັງມີ 4 ຄົນ ແມ່ນສືບຕໍ່ນອນຕິດຕາມອາການ ແລະ ປິ່ນປົວຢູ່ໂຮງໝໍທີ່ຖືກກຳນົດໄວ້. ຕໍ່ສະພາບດັ່ງກ່າວ, ເພື່ອສະກັດກັ້ນບໍ່ໃຫ້ເກີດການລະບາດ ແລະ ຂະຫຍາຍເປັນວົງກວ້າງ

    ໃນປະເທດເຮົາ, ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມເປັນເຈົ້າການປະຕິບັດມາດຕະການປ້ອງກັນການຕິດເຊື້ອຢ່າງຖືກຕ້ອງ ແລະ ເຂັ້ມງວດ ເປັນຕົ້ນ ການສວມໃສ່ຜ້າອັດປາກ-ດັງ ເມື່ອເດີນທາງອອກຈາກເຮືອນ, ໝັ່ນລ້າງມືດ້ວຍນ້ຳສະອາດໃສ່ສະບູ, ຮັກສາມາລະຍາດໃນການໄອ-ຈາມ, ຮັກສາໄລຍະຫ່າງທາງສັງຄົມ 1-2 ແມັດຂຶ້ນໄປ, ກິນອາຫານທີ່ປຸງແຕ່ງສຸກໃໝ່, ບໍ່ໃຊ້ສິ່ງຂອງຮ່ວມກັນ, ອາບນ້ຳ ແລະ ປ່ຽນເສື້ອຜ້າທັນທີ ເມື່ອທ່ານກັບຮອດເຮືອນ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.