ບໍ່ງ່າຍເລີຍ ກວ່າຈະມາເປັນ ເກຍ ອູ໊ສິດທິເດດ ໃນມື້ນີ້ຕ້ອງຜ່ານຜ່າຫຍັງແດ່?

    0
    361

    ຄົນໆໜຶ່ງທີ່ເປັນກຳມະກອນສູ້ຊົນຈົນມີທຸລະກິດໃຫຍ່ໆເປັນຂອງຕົນເອງ ແລະ ກາຍເປັນນັກທຸລະກິດທີ່ມີຊື່ສຽງ ແລະ ເປັນທີ່ຮູ້ຈັກຂອງຄົນໃນສັງຄົມ ນັ້ນບໍ່ແມ່ນເລື່ອງງ່າຍ ຕ້ອງລົ້ມລຸກຄຸກຄານຜ່ານຜ່າອຸປະສັກຕ່າງໆນາໆ ແຕ່ຍ້ອນຄະຕິທີ່ວ່າ: “ ຂະຫຍັນ, ອົດທົນ, ປະຢັດ, ສັດຊື່ ” ຈຶ່ງເຮັດໃຫ້ບຸກຄົນນີ້ກ້າວມາເຖິງຈຸດນີ້ໄດ້.
    ທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມ ແລະ ນໍ້າກ້ອນໂລມາຄຳ ໄດ້ກ່າວວ່າ: ເມື່ອກ່ອນໄດ້ຢູ່ດົງຢູ່ປ່າຍ້ອນແຕກເສິກສົງຄາມ ເພາະສະໄໝນັ້ນຍັງບໍ່ທັນປົດປ່ອຍ,

    ເຮັດໄຮ່, ເຮັດສວນລ້ຽງຊີບ ຫຼັງຈາກປົດປ່ອຍກໍໄດ້ຍ້າຍມາຢູ່ໃນແຂວງສະຫວັນນະເຂດ ໂດຍມາເປັນກຳມະກອນ 3 ປີ ກໍຝັນຢາກມີທຸລະກິດນ້ອຍໆເປັນຂອງຕົນເອງ ເພາະມັກເຮັດທຸລະກິດ ຈຶ່ງສູ້ຊົນມາຈົນເຖິງທຸກວັນນີ້ ແລະ ການເຮັດທຸລະກິດບໍ່ແມ່ນວ່າເຮົາຈະເຮັດໃຫຍ່ບາດດຽວ ເຮົາບໍ່ແມ່ນນັກທຸລະກິດສືບທອດ ແຕ່ເປັນນັກທຸລະກິດໄຕ່ເຕົ້າ ໂດຍເລີ່ມຈາກເປັນກຳມະກອນ, ມາເຮັດໂຮງຂົ້ວກາເຟ, ຕົ້ມເຫຼົ້າ ແລະ ເຮັດຫຼາຍສິ່ງຫຼາຍຢ່າງຕາມທ່າແຮງທີ່ເຮົາມີ.

    ມາຮອດປັດຈຸບັນແມ່ນເຮັດທຸລະກິດດູດຫີນ, ແຮ່ຊາຍ, ບໍລິສັດກໍ່ສ້າງສ້ອມແປງຂົວ – ທາງ ແລະ ໂຮງງານນໍ້າດື່ມນໍ້າກ້ອນໂລມາຄຳ, ກ່ອນຈະຕັດສິນໃຈມາເຮັດໂຮງງານນໍ້າດື່ມນໍ້າກ້ອນໂລມາຄຳນີ້ ຕອນນັ້ນລັດໄດ້ຫັນປ່ຽນທຸລະກິດນໍ້າກ້ອນຂອງລັດສູ່ກົນໄກກຳມະສິດອື່ນ ເຮົາກໍໄດ້ເຊັນສັນຍາຮ່ວມກັບພາກລັດແຂວງສະຫວັນນະເຂດ ນັບແຕ່ປີ 1988 ເປັນຕົ້ນມາ. ດັ່ງນັ້ນ, ເຮົາຈຶ່ງຂະຫຍາຍມາເຮັດນໍ້າດື່ມອີກ ແຕ່ເຮົາກໍເລືອກທີ່ຈະເຮັດໃຫ້ໄດ້ຄຸນນະພາບ ເພື່ອເປັນທາງເລືອກໃຫ້ແກ່ສັງຄົມ ແລະ ທີ່ສຳຄັນຫາກເຮົາ

    ຜະລິດສິນຄ້າທີ່ໄດ້ມາດຕະຖານ ມັນກໍສະແດງເຖິງ ຄວາມໝັ້ນຄົງຂອງທຸລະກິດເຮົາໄວ້ຢ່າງຍືນຍົງ, ດັ່ງນັ້ນເຮົາຈຶ່ງສູ້ຊົນໃຫ້ຜ່ານ ອຢ, ມາດຕະຖານແຫ່ງຊາດ, ຈົດເປັນຊັບສິນທາງປັນຍາເປັນລິຂະສິດຂອງເຮົາເອງ, ມາດຕະຖານສາກົນ ISO 22000 ເປັນປີທີ 6 ແລ້ວ, ສ່ວນຕະຫຼາດຈຳໜ່າຍນອກຈາກແຂວງສະຫວັນນະເຂດ ແລະ ແຂວງໃກ້ຄຽງແລ້ວຢູ່ນະຄອນຫຼວງວຽງຈັນ ມີຈຸດຈຳໜ່າຍ 2 ຈຸດ ຄື: ສາລາຄຳ ເມືອງຫາດຊາຍຟອງ ແລະ ດົງໂດກ.

    ຕະຫຼອດການດຳເນີນທຸລະກິດຜ່ານມາ ແມ່ນບໍ່ເຄີຍພົບບັນຫາທີ່ໃຫຍ່ເກີນໄປ ເພາະເຮົາຈະເຮັດຕາມທ່າແຮງທີ່ເຮົາມີ ຄວາມຫຍຸ້ງຍາກກໍບໍ່ຫຼາຍ, ທີ່ສຳຄັນແມ່ນມັກການບໍລິຫານແບບຄອບຄົວ ໂດຍສ້າງພະນັກງານກຳມະກອນຂຶ້ນມາຄຸ້ມຄອງກັນເອງ, ບໍລິຫານກັນເອງ ໂດຍໃຫ້ທຸກຄົນເປັນເຈົ້າການນຳກັນ ແລະ ທ່າມກາງເສດຖະກິດທີ່ມີຄວາມ

    ຫຍຸ້ງຍາກແບບນີ້ ການບໍລິຫານແບບຄອບຄົວຍັງໃຊ້ໄດ້ດີ ເພາະທຸກຢ່າງແມ່ນພະນັກງານກຳມະກອນເປັນເຈົ້າການ ເພາະມັນຕິດພັນກັບຜົນປະໂຫຍດຂອງເຂົາເຈົ້າ ແລະ ເຮົາກໍມີລະບຽບວາງອອກໃຫ້ເຂົາເຈົ້າໄປຕິບັດ.

    ຜ່ານການເຮັດທຸລະກິດຜ່ານມາບໍ່ເຄີຍມີວ່າເຮັດມາແລ້ວບໍ່ໄດ້ຂາຍ ເພາະກ່ອນຈະຂະຫຍາຍຕະຫຼາດເຮົາກໍເບິ່ງຕະຫຼາດກ່ອນ, ຈາກນັ້ນກໍເບິ່ງພະນັກງານ ແລ້ວສຸດທ້າຍກໍເບິ່ງເລື່ອງທຶນຮອນ ຫາກກູ້ຢືມມາຄວາມອາດສາມາດໃນການໃຊ້ໜີ້ເປັນຄືແນວໃດ? ທີ່ສຳຄັນຂ້າພະເຈົ້າຫຼີກລຽງການເຮັດໃຫຍ່ ຈະເຮັດເທົ່າທີ່ມີ ຄວາມສາມາດເຮັດໄດ້ເທົ່ານັ້ນກໍເລີຍ

    ບໍ່ຄ່ອຍພົບບັນຫາທີ່ໜັກເຂົ້າມາ.ສຳລັບແຮງຜັກດັນທີ່ເຮັດໃຫ້ມີກຳລັງໃຈໃນການເຮັດວຽກທຸກມື້ນີ້ແມ່ນ “ ມັກຍ້ອງ ” ອ້າຍນ້ອງພະນັກງານຍ້ອງວ່ານາຍດີ ແລະ ດ້ານຄອບຄົວກໍເປັນກຳລັງໃຈທີ່ດີໃຫ້.

    ຖ້າຖາມວ່າມີຄວາມພູມໃຈໃນຕົວເອງບໍ່ກໍພູມໃຈ ເພາະຈາກເປັນກຳມະກອນມາເປັນພໍ່ຄ້າຂົ້ວກາເຟແລ້ວມີໂຮງງານທີ່ໃຫຍ່ພໍສົມຄວນ, ແຕ່ກວ່າຈະມາຮອດມື້ນີ້ໄດ້ຄະຕິປະຈຳຕົວຂອງຂ້າພະເຈົ້າແມ່ນການໃຫ້ຄວາມສຳຄັນບຸກຄະລາກອນ, ດ້ານຄຸນນະພາບ ໂດຍປະຕິບັດຕາມຄະຕິທີ່ວ່າ: “ ຂະຫຍັນ, ອົດທົນ, ປະຢັດ, ສັດ ຊື່ ”.

    ສ່ວນກົນລະຍຸດໃນການບໍລິຫານແມ່ນບໍລິຫານແບບຄອບຄົວ, ເນັ້ນສ້າງບຸກຄະລາກອນພາຍໃນ ເຮັດຫຍັງແບບຄົນໃນຄອບຄົວດຽວກັນ ຄົນຜູ້ໜຶ່ງຕ້ອງເຮັດໄດ້ຫຼາຍຢ່າງຕົວຢ່າງ: ໜຶ້ງເຂົ້າໄດ້, ລ້າງຖ້ວຍໄດ້, ແຕ່ງກິນໄດ້.

    ດ້ານການແບ່ງເວລາກໍຈະຫຼຸດການອອກງານສັງຄົມ ເພື່ອໃຫ້ຄວາມສຳຄັນ, ໃຫ້ການເອົາໃຈໃສ່ເບິ່ງແຍງແມ່ເປັນພິເສດ ພາຍຫຼັງທີ່ພໍ່ເສຍມາໄດ້ 10 ປີນີ້ກໍເລີຍໃຫ້ຄວາມໃກ້ຊິດກັບແມ່ ຕ້ອງນັ່ງກິນເຂົ້າກັບແມ່ມື້ລະ 3 ຄາບ ເຊົ້າ, ສວາຍ, ແລງ ກໍປະຕິບັດແບບນີ້ທຸກມື້.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.