ຫົວໜ້າອົງການ WWF-Laos ລົງພົບປະຊາຊົນ ແລະ ສຳຫລວດສ້າງວັງສະຫງວນ ທີ່ເມືອງໄຊພູທອງ

    0
    130

    ໃນວັນທີ 4 ກຸມພາ 2021 ທ່ານ ລໍຣິສ ພາເລັນຕີນີ ຫົວໜ້າອົງການກອງທຶນອະນຸຮັກທຳມະຊາດໂລກ ປະຈຳ ສປປ ລາວ (WWF-Laos) ແລະ ທີມງານຂອງຫ້ອງການກະສິກຳ ແລະ ປ່າໄມ້ ໄດ້ລົງພົບປະໂອ້ລົມປະຊາຊົນ ແລະ ສຳຫລວດສະຖານທີ່ສ້າງວັງສະຫງວນ ຢູ່ບ້ານນາພານ, ບ້ານຄັນທ່າຈານ ແລະ ບ້ານເຮືອນຫີນ ເມືອງໄຊພູທອງ, ແຂວງສະຫວັນນະເຂດ ພາຍຫລັງທີ່ໄດ້ເຊັນບົດບັນທຶກຄວາມເຂົ້າໃຈ ກ່ຽວກັບໂຄງການສົ່ງເສີມການຈັດການວຽກງານການປະມົງ ຢູ່ລຽບຕາມລຳແມ່ນໍ້າຂອງ ເພື່ອອະນຸລັກຈຳນວນປະຊາກອນປາ ທັງເປັນການສ້າງຈິດສຳນຶກ ກ່ຽວກັບການຄຸ້ມຄອງ, ຊົມໃຊ້ປາ ແລະ ສັດນໍ້າອື່ນໆແບບຍືນຍົງ. ພ້ອມປັບປຸງຊີວິດການເປັນຢູ່ ຂອງຊຸມຊົນທີ່ອາໄສຢູ່

    ລຽບຕາມແຄມແມ່ນໍ້າຂອງໃຫ້ດີຂຶ້ນ, ເຊິ່ງປະຊາຊົນໃນເຂດດັ່ງກ່າວແມ່ນ ເຫັນດີທີ່ຈະສ້າງວັງສະຫງວນ ຢູ່ໃນເຂດບ້ານຂອງຕົນ.ທ່ານ ອູ່ ແພງກັນຍາ ນາຍບ້ານ ຄັນທ່າຈານ ໄດ້ໃຫ້ຮູ້ວ່າ: ບ້ານຄັນທ່າຈານ ມີພົນລະເມືອງ 1.113 ຄົນ, ມີ 226 ຄອບຄົວ, ພົນລະເມືອງກວມ 80% ແມ່ນຍຶດຖືອາຊີບເຮັດນາ ແລະ ຫາປາເປັນຫລັກ ໂດຍອາໄສການໄຫລມອງຕາມລຳນ້ຳຂອງ. ໃນເມືອກ່ອນ ສັດນ້ຳ ແລະ ຊີວະນາໆພັນ ໃນແມ່ນ້ຳຂອງມີຫລາຍ ໂດຍສະເພາະປາຊະນິດຕ່າງໆ, ເຊິ່ງເຄື່ອງມືໃນການຫາປາໃນຕອນນັ້ນ ກໍໃຊ້ແບບທຳມະຊາດ, ຫາກໍບໍ່ໄດ້ຫລາຍປານໃດພໍແຕ່ກຸ້ມກິນ. ແຕ່ມາຮອດປັດຈຸບັນ ປະຊາກອນປາໄດ້ຫລຸດລົງ ແລະ ການຫາປາກໍໄດ້ໜ້ອຍລົງ ເນື່ອງຈາກ ປະຊາຊົນບ້ານຫັນ

    ມາຫາປາ ເພື່ອເປັນເສດຖະ ກິດ ເຮັດໃຫ້ການຫາປາເປັນຂະບວນຫລາຍຂຶ້ນ ເພາະມີເຄື່ອງມືທີ່ທັນສະໄໝຫລາຍ. ຖ້າວ່າມີໂຄງການສ້າງວັງສະຫງວນຂຶ້ນ ອາດຈະເປັນການດີ ເພາະວ່າຈະເຮັດໃຫ້ປະຊາຊົນ ບໍ່ໄດ້ຫາປາແບບຊະຊາຍອີກ ແລະ ຫາແບບມີຂອບເຂດ ແລະ ວັງສະຫງວນຍັງຈະເປັນບ່ອນພັກ ແລະ ວາງໄຂ່ຂອງປາ ອາດເຮັດໃຫ້ປະຊາກອນປາເພີ່ມຫລາຍຂຶ້ນ.ສ່ວນ ພໍ່ ກອງມີ ຈັນທະວົງ ອາຍຸ 60 ປີ ປະຊາຊົນ ບ້ານນາພານ ໄດ້ເວົ້າວ່າ: ພໍ່ກໍເປັນຊາວ ນາຄົນໜຶ່ງ ຫລັງຈາກເຮັດນາແລ້ວ ອາຊີບຫລັກ ກໍຄື ຫາປາຕາມລຳແມ່ນ້ຳຂອງ, ເຊິ່ງແຕ່ລະມື້ໄດ້ປາ ປະມານ 10 ກິໂລ, ປາສ່ວນຫລາຍທີ່ຈັບໄດ້ມີ ປານາງ, ປາເສືອ, ປາກົດ, ປາເຄິງ, ປາເພ້ຍ, ປາຢາງ, ປາປາກ ແລະ ປາອື່ນ

    ໆ ອີກຫລາຍຊະນິດ. ປີໜຶ່ງສາມາດສ້າງລາຍໄດ້ໃຫ້ຄອບຄົວປະມານ 20 ລ້ານກີບ, ແຕ່ວ່າມາປັດຈຸບັນ, ການຫາປາແມ່ບໍ່ໄດ້ຫລາຍຄືເມື່ອກ່ອນ ປາໃຫຍ່ບາງຊະນິດທີ່ເຄີຍຈັບໄດ້ ກໍບໍ່ມີແລ້ວ. ສະນັ້ນ, ຖ້າຫາກທາງຂັ້ນເທິງເພິ່ນຈະມີໂຄງການສ້າງວັງສະຫງວນຂຶ້ນ ກໍເປັນການດີທີ່ສຸດ ເພາະມັນຈະໄດ້ມີລະບຽບການໃນການຄຸ້ມຄອງ ແລະ ອະນຸລັກປາບາງຊະນິດທີ່ໃກ້ຈະສູນພັນ ໄວ້ໃຫ້ລູກຫລານໄດ້ເຫັນໃນອະນາຄົດ, ເນື່ອງຈາກວ່າປັດຈຸບັນ ປາມີຈຳນວນໜ້ອຍລົງ ເພາະຢູ່ບ້ານເຮົາກໍບໍ່ເຄີຍມີວັງສະຫງວນ ເຮັດໃຫ້ປະຊາຊົນຫາປາແບບຊະຊາຍ ຫາປາທຸກມື້ ແລະ ທຸກລະດູການ.

    ຂ່າວ-ພາບ: ມະນີທອນ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.