ລັດຖະບານ ສປ ຈີນ ມອບວັກຊີນປ້ອງກັນ ພະຍາດໂຄວິດ ໃຫ້ລາວ 300.000 ໂດສ

    1
    103

    ລັດຖະບານ ສປ ຈີນ ໄດ້ມອບວັກຊີນປ້ອງກັນພະຍາດໂຄວິດ-19 ຈຳນວນ 300.000 ໂດສ ພ້ອມດ້ວຍເຊີແລງ ຈຳນວນ 300.800 ອັນ, ເຊິ່ງເປັນການຊ່ວຍເຫລືອລ້າ ໃຫ້ແກ່ ສປປ ລາວ ເພື່ອນຳໄປສັກໃຫ້ບັນດາກຸ່ມສ່ຽງ ໂດຍສະເພາະກຸ່ມພະນັກງານແພດໝໍ, ພະນັກງານປະຈຳດ່ານເຂົ້າ-ອອກຕ່າງໆ ແລະ ພະນັກງານ ທີ່ປະຈຳຢູ່ບັນດາສູນກັກກັນໃນຂອບເຂດທົ່ວປະເທດ.ພິທີມອບ-ຮັບ ວັກຊິນດັ່ງກ່າວ, ໄດ້ຈັດຂຶ້ນຢ່າງເປັນທາງການ ໃນວັນທີ 8 ກຸມພາ 2021 ໃຫ້ກຽດຕາງໜ້າມອບໂດຍ, ທ່ານ ຈ່ຽງ ຈາຍຕຸ່ງ ເອກອັກຄະລັດຖະທູດຈີນ ປະຈໍາ ສປປ ລາວ ແລະ ຕາງໜ້າລັດຖະບານລາວ ກ່າວຮັບ ໂດຍ ທ່ານ ພັນຄຳ ວິພາວັນ ຮອງປະທານປະເທດ, ໂດຍມີພະນັກງານຈາກຂະແໜງການທີ່ກ່ຽວຂ້ອງສອງຝ່າຍ ເຂົ້າຮ່ວມ. ນີ້ແມ່ນຄັ້ງທີ 2 ທີ່ລັດຖະບານ ສປ ຈີນ ໄດ້ໃຫ້ການຊ່ວຍ ເຫລືອວັກຊີນແກ່ ສປປ ລາວ, ໂດຍຄັ້ງທຳອິດແມ່ນ ຈຳນວນ 2.000 ໂດສ. ໂອກາດນີ້, ທ່ານ ຈ່ຽງ ຈາຍຕຸ່ງ ກ່າວວ່າ: ລັດຖະບານ ສປ ຈີນ ມີຄວາມພາກພູມໃຈທີ່ສຸດທີ່ໄດ້ແບ່ງປັນວັກຊິນຈຳນວນນີ້ ໃຫ້ແກ່ປະຊາຊົນລາວບັນດາເຜົ່າ ແລະ ໄດ້

    ເລືອກເອົາ ສປປ ລາວ ເປັນປະ ເທດທຳອິດທີ່ໃຫ້ການຊ່ວຍເຫລືອຢາວັກຊີນ. ບັນດາຂະແໜງການທີ່ກ່ຽວຂອງສອງປະເທດ ລາວ ແລະ ຈີນ ໄດ້ເຮັດວຽກຮ່ວມກັນຢ່າງໃກ້ຊິດຕະຫລອດເວລາ ເພື່ອນຳເອົາວັກຊີນປ້ອງກັນພະຍາດໂຄວິດ-19 ສົ່ງມາ ສປປ ລາວ ໃຫ້ໄວທີ່ສຸດ.ໃນສະພາບການທີ່ພະຍາດໂຄວິດ-19 ຍັງສືບຕໍ່ການແຜ່ບາດ, ຝ່າຍຈີນ ມີຄວາມຍິນດີຢ່າງສຸດຄວາມພະຍາຍາມ ເພື່ອປະກອບສ່ວນເຂົ້າໃນການຊ່ວຍເຫລືອ ສປປ ລາວ ໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດດັ່ງກ່າວ ຢູ່ພາຍໃນປະເທດໃນຕໍ່ໜ້າ ແລະ ຫວັງຢ່າງຍິ່ງວ່າ ສອງປະເທດ ຈະສາມາດນຳເອົາການຮ່ວມມືເພື່ອຕໍ່ຕ້ານພະຍາດໂຄວິດ-19 ເປັນສ່ວນປະກອບທີ່ສຳຄັນເຂົ້າໃນການເສີມສ້າງຄູ່ຮ່ວມຊາຕາກຳ ຈີນ-ລາວ, ລາວ-ຈີນ. ໂອກາດດຽວກັນ, ທ່ານ ພັນຄຳ ວິພາວັນ ໂດຍຕາງໜ້າໃຫ້ ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈເປັນຢ່າງສູງ ໄປຍັງພັກ, ລັດຖະບານ ແລະ ປະຊາຊົນຈີນ ທີ່ເວລາໃດກໍໄດ້ສະແດງຄວາມເປັນຫ່ວງເປັນໃຍ ແລະ ໃຫ້ການຊ່ວຍເຫລືອອັນລ້ຳຄ່າແກ່ລັດຖະບານ ກໍຄື ປະຊາຊົນລາວ.

    ທ່ານຮອງປະທານປະເທດ ໄດ້ຕີລາຄາສູງ ຕໍ່ການຊ່ວຍເຫລືອອັນສະເໝີຕົ້ນສະເໝີປາຍ ແລະ ທັນການ ບໍ່ວ່າຈະເປັນທາງດ້ານອຸປະກອນການແພດ, ໜ້າກາກອານະໄມ, ນ້ຳຢາກວດເຊື້ອພະຍາດ ລວມທັງຢາວັກຊີນ ເພື່ອປ້ອງກັນພະຍາດໂຄວິດ-19 ໃນໄລຍະຜ່ານມາ ກໍຄື ການຊ່ວຍເຫລືອເພີ່ມໃໝ່ໃນຄັ້ງນີ້, ເຊິ່ງໄດ້ປະກອບສ່ວນອັນສໍາຄັນ ເຮັດໃຫ້ລັດຖະບານລາວ ມີຜົນສໍາເລັດໃນການປ້ອງກັນ ແລະ ຕ້ານການລະບາດຂອງພະຍາດໂຄວິດ-19 ໃນລະດັບສູງຄືໃນປັດຈຸບັນ. ພ້ອມທັງຕີລາຄາສູງດ້ານປະສິດທິພາບ ແລະ ຄວາມປອດໄພຂອງວັກຊີນປ້ອງກັນພະຍາດໂຄວິດ-19 ທີ່ ສປ ຈີນ ໄດ້ມອບໃຫ້ແກ່ ສປປ ລາວ ນີ້, ເຊິ່ງໄດ້ມີບັນດາແພດໝໍ ຜູ້ທີ່ປະຕິບັດວຽກງານປະຈັນບານກັບຄົນເຈັບ ແລະ ກຸ່ມສ່ຽງຈໍານວນໜຶ່ງ ໄດ້ສັກຢາວັກຊີນທີ່ທາງ ສປ ຈີນ ຊ່ວຍເຫລືອໃນເບື້ອງຕົ້ນແລ້ວ, ເຫັນວ່າ ພວກເຂົາເຈົ້າແຂງແຮງປົກກະຕິດີ, ບໍ່ມີອາການຂ້າງຄຽງຫຍັງ ແລະ ມີພູມຕ້ານທານເພີ່ມຂຶ້ນ ເຊິ່ງເປັນການຢັ້ງຢືນວ່າ ວັກຊີນດັ່ງກ່າວ, ມີຄວາມປອດໄພ ແລະ ປະສິດທິພາບສູງ. ການຊ່ວຍເຫລືອຄັ້ງນີ້, ເປັນການສະແດງເຖິງນ້ຳໃຈເອື້ອເຟື້ອ

    ເພື່ອ ແຜ່ຂອງລັດຖະບານ ແລະ ປະຊາຊົນຈີນ ເຖິງແມ່ນວ່າ ຢູ່ ສປ ຈີນເອງ ກໍມີຄວາມຂາດແຄນ ແລະ ຕ້ອງການຢາວັກຊີນດັ່ງກ່າວເຊັ່ນດຽວກັນ, ແຕ່ລັດຖະບານ ແລະ ປະຊາຊົນຈີນ ກໍຍັງໄດ້ບິແບ່ງມາຊ່ວຍເຫລືອລັດຖະບານ ແລະ ປະຊາຊົນລາວ, ເຊິ່ງເປັນການສະແດງເຖິງການເປັນເພື່ອນມິດສະຫາຍອ້າຍນ້ອງທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເສີມຂະຫຍາຍ ແລະ ເຂົ້າສູ່ລວງເລິກຢ່າງບໍ່ຢຸດຢັ້ງ.ທ່ານຮອງປະທານປະເທດ ໃຫ້ຄຳໝັ້ນສັນຍາວ່າ: ຈະນໍາໃຊ້ຢາວັກຊິນດັ່ງກ່າວ, ໃຫ້ເກີດຜົນປະ ໂຫຍດສູງສຸດ ໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ. ພ້ອມດຽວກັນ, ກໍສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນສະຫລາດສ່ອງໃສ ຂອງພັກ ແລະ ລັດຖະບານ ສປ ຈີນ ອັນມີ ສະຫາຍ ສີ ຈິ້ນຜິງ ເປັນແກນກາງ, ປະຊາຊົນຈີນ ຈະສາມາດເອົາຊະນະການແຜ່ລະບາດຂອງພະຍາດໂຄວິດ-19 ໄດ້ຢ່າງເດັດຂາດໃນເວລາອັນໃກ້ນີ້ ແລະ ສາ ມາດຟື້ນຟູເສດຖະກິດ-ສັງຄົມ ທີ່ໄດ້ຮັບຜົນກະທົບຈາກພະຍາດດັ່ງກ່າວ ກັບຄືນສູ່ປົກກະຕິໂດຍໄວ.

    ຂ່າວ: ສິງຄຳ, ພາບ: ເກດສະໜາ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.