ພົບຜູ້ຕິດເຊື້ອໂຄວິດ-19 ເພີ່ມອີກ 1ຄົນ ເປັນແຮງງານລາວຕົກຄ້າງຈາກປະເທດມາເລເຊຍ.

    0
    1257

    ຄະນະສະເພາະກິດຖະແຫຼງ ວັນທີ 24 ມັງກອນ 2021 ລາວເຮົາກວດພົບຜູ້ຕິດເຊື້ອໂຄວິດ-19 ເພີ່ມອີກ 1ຄົນ ເປັນກໍລະນີ 44 ເຊິ່ງຜູ້ກ່ຽວເປັນແຮງງານຕົກຄ້າງຈາກປະເທດມາເລເຊຍ, ປັດຈຸບັນໄດ້ນໍາຕົວມາແຍກປ່ຽວ ແລະ ເຂົ້າຮັບການປິ່ນປົວຕິດຕາມອາການຢູ່ໂຮງໝໍມິດຕະພາບແລ້ວ. ດ້ານອາການຂອງຜູ້ຕິດເຊື້ອກໍລະນີ 42 ແລະ 43 ແມ່ນປົກກະຕິດີ ບໍ່ມີໄຂ້ ແຕ່ຍັງຕ້ອງຕິດຕາມອາການຕໍ່.

    ໃນວັນທີ 25 ມັງກອນ 2021 ທີ່ກະຊວງສາທາລະນະສຸກ ໄດ້ມີພະທີຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໂດຍການຖະແຫຼງຂອງທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ແລະ ທ່ານ ດຣ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນສຸກ.

    ທ່ານ ດຣ ນາງ ພອນປະເສີດ ໄຊຍະມຸງຄຸນ ກ່າວວ່າ: ຮອດ 5 ໂມງແລງ ຂອງວັນທີ 24 ມັງກອນ 2021, ທົ່ວປະເທດມີຜູ້ເດີນທາງເຂົ້າມາ ມີທັງໝົດ 2.360 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ແລ້ວຈຶ່ງນຳສົ່ງໄປຫາສະຖານທີ່ ຈຳກັດບໍລິເວນທີ່ກຳນົດໄວ້ ຈົນກວ່າຈະຄົບກຳນົດ 14 ວັນ.

    ດ້ານການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ, ໃນວັນທີ 24 ມັງກອນ 2021, ໄດ້ເກັບຕົວຢ່າງມາກວດວິເຄາະທັງໝົດ 356 ຄົນ, ໃນນັ້ນ ມີ 3 ຕົວຢ່າງ ຈາກບຸກຄົນທົ່ວໄປມີອາການ, 73 ຕົວຢ່າງຈາກບຸກຄົນທົ່ວໄປບໍ່ມີອາການ; ແຮງງານລາວກັບມາແຕ່ໄທ 32 ຕົວຢ່າງ; ແຮງງານຈີນ 199 ຕົວຢ່າງ ແລະ ແຮງງານໄທ 49 ຕົວຢ່າງ; ຜົນກວດວິເຄາະທັງໝົດ ແມ່ນພົບຜູ້ຕິດເຊື້ອໃໝ່ ຈຳນວນ 1 ຄົນ. ສັງລວມການກວດວິເຄາະ ນັບແຕ່ ເດືອນມັງກອນ 2020 ຮອດ ວັນທີ 24 ມັງກອນ 2021 ໄດ້ເກັບຕົວຢ່າງມາກວດທັງໝົດ 101.489 ຕົວຢ່າງ, ກວດພົບເຊື້ອສະສົມ 44 ຄົນ.

    ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ວັນທີ 24 ມີຜູ້ຕິດເຊື້ອໃໝ່ອີກ 1ຄົນ ເຊິ່ງເປັນກໍລະນີທີ 44 ເປັນເພດຍິງ ອາຍຸ 29ປີ, ສັນຊາດລາວ, ເປັນແຮງງານຕົກຄ້າງຢູ່ປະເທດມາເລເຊຍ, ໃນໄລຍະວັນທີ 5-6 ມັງກອນ ຜູ້ກ່ຽວມີອາການເຈັບເປັນ ໄຂ້, ໄອ ແຕ່ບໍ່ໄດ້ໄປກວດຢູ່ໂຮງໝໍ ແລະໄດ້ຊື້ຢາມາກິນເອງ 2-3ວັນອາການກໍ່ດີຂຶ້ນ.

    ທັ້ງນີ້ ກ່ອນຈະເດີນທາງມານະຄອນຫຼວງວຽງຈັນ ຜູ້ກ່ຽວໄດ້ຮັບການກວດຕົວຢ່າງຊອກຫາເຊື້ອໂຄວິດ-19 ໃນວັນທີ 22 ມັງກອນ 2021, ເຊິ່ງຜົນກວດຈາກເຄື່ອງ PCR ຢູ່ກົວລາລໍາເປີ ປະເທດມາເລເຊຍ ຢັ້ງຢືນວ່າບໍ່ພົບເຊື້ອ ຜູ້ກ່ຽວຈຶ່ງໄດ້ຮັບອະນຸຍາດໃຫ້ເດີນທາງມາກັບຖ້ຽວບິນມະນຸດສະທໍາ ເພື່ອເດີນທາງມານະຄອນຫຼວງວຽງຈັນ ໃນວັນທີ 24 ມັງກອນ 2021 ແລະ ມາຮອດ ສປປ ລາວ ໃນເວລາ 8:20 ໂມງ, ພາຍຫຼັງມາຮອດສະໜາມບິນກໍ່ໄດ້ເກັບຕົວຢ່າງໄປກວດວິເຄາະຫາເຊື້ອໂຄວິດ-19 ແລະ ນໍາສົ່ງເຂົ້າໄປຈໍາກັດບໍລິເວນຢູ່ສູນຫຼັກ 27 ດ້ວຍລົດເມ.

    ເຊິ່ງຜົນກວດໃນມື້ດຽວກັນ ກໍ່ຄືຕອນແລງວັນທີ 24 ມັງກອນ 2021 ພົບວ່າຜູ້ກ່ຽວມີເຊື້ອໂຄວິດ-19 ຜົນກວດເປັນບວກ, ຄະນະຮັບຜິດຊອບ ຈຶ່ງໄດ້ນໍາສົ່ງຜູ້ກ່ຽວເຂົ້າມາແຍກປ່ຽວ ແລະ ນອນຕິດຕາມປິ່ນປົວຢູ່ໂຮງໝໍມິດຕະພາບໃນວັນດຽວກັນນັ້ນ. ເຊິ່ງປັດຈຸບັນຜູ້ກ່ຽວກໍ່ບໍ່ມີອາການຫຍັງສະແດງອອກ, ບໍ່ມີອາການໄຂ້, ບໍ່ມີອາການຜິດປົກກະຕິທາງລະບົບຫາຍໃຈ ເຊິ່ງຖືເປັນກໍລະນີທີ່ເຮົາພົບເຫັນຫຼາຍໃນສະພາບປັດຈຸບັນນີ້.

    ນອກຈາກນີ້, ພວກເຮົາໄດ້ຕິດຕາມເບິ່ງຜູ້ສໍາຜັດໃກ້ຊິດກັບກໍລະນີທີ 44 ນີ້ ພົບທັງໝົດ 58ຄົນ, ໃນນີ້ ນັ່ງຖ້ຽວບິນດຽວກັນມີ 26ຄົນ, ນັ່ງລົດເມຮ່ວມກັນເພື່ອໄປສູນຈໍາກັດບໍລິເວນຫຼັກ 27 ຈໍານວນ 32ຄົນ, ເຊິ່ງໄດ້ເກັບຕົວຢ່າງທັງໝົດມາກວດເຫັນວ່າບໍ່ພົບເຊື້ອ ແຕ່ພວກເຮົາກໍ່ໄດ້ສືບຕໍ່ເຝົ້າລະວັງ, ຕິດຕາມຢູ່ສູນຈໍາກັດບໍລິເວນຈົນຄົບ 14ວັນ ກ່ອນຈະອອກສູນກໍ່ຈະໄດ້ກວດຫາເຊື້ອໂຄວິດ-19 ອີກ ໝັ້ນໃຈວ່າບໍ່ຕິດເຊື້ອແລ້ວ ຈຶ່ງຈະໃຫ້ໄປຕິດຕາມອາການຢູ່ບ້ານເຮືອນຂອງເຂົາເຈົ້າ.

    ສໍາລັບຜູ້ຕິດເຊື້ອກໍລະນີ 42 ແລະ 43 ທີ່ເຂົ້າຮັບການປິ່ນປົວຢູ່ໂຮງໝໍກ່ອນໜ້ານີ້ນັ້ນ ທັງສອງແມ່ນມີອາການປົກກະຕິທາງດ້ານລະບົບຫາຍໃຈ ແລະ ບໍ່ມີອາການໄຂ້, ຈະໄດ້ສືບຕໍ່ຕິດຕາມ ແຍກປ່ຽວຢູ່ໃນໂຮງໝໍນັ້ນ ຈົນກວ່າຈະມີຜົນກວດເປັນລົບສອງຄັ້ງຕິດຕໍ່ກັນ ຈຶ່ງຈະໄດ້ໃຫ້ອອກຈາກໂຮງໝໍ.

    ທີ່ມາ ຫນັງສືພິມເສດຖະກິດການຄ້າ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.