ສາທຸໆ ເຊີນຊວນທຸກຄົນຮ່ວມງານສົມໂພດ ຮູບປັ້ນພຣະເຈົ້າໄຊຍະເສດຖາທິລາດຊົງປະທັບຊ້າງ ທີ່ແຂວງອັດຕະປື

    0
    217

    ສາທຸ ອຳນາດການປົກຄອງແຂວງອັດຕະປື ແລະ ບໍລິສັດວັງຕັດ ຂຸດຄົ້ນບໍ່ແຮ່ຈໍາກັດ ຊຶ່ງເປັນບໍລິສັດທີ່ສະໜັບສະໜູນໂຄງການຫຼໍ່ຮູບປັ້ນພຣະເຈົ້າໄຊຍະເສດຖາທິລາດ ແລະ ໂຄງການກໍ່ສ້າງອະນຸສາວະລີ ພຣະເຈົ້າໄຊຍະເສດຖາທິລາດ ຮ່ວມກັນຈັດງານສົມໂພດ ຫຼື ງານສູດຮູບປັ້ນພຣະເຈົ້າໄຊຍະເສດຖາທິລາດຊົງປະທັບຊ້າງເພື່ອປະດິດສະຖານໄວ້ທີ່ອະນຸສາວະລີ

    ທີ່ບ້ານຫາດຊາຍຂາວ ເມືອງໄຊເສດຖາ ແຂວງອັດຕະປື ເພື່ອໃຫ້ປະຊາຊົນແຂວງອັດຕະປືໄດ້ກາບໄຫວ້ ແລະ ບູຊາ, ຊຶ່ງງານສົມໂພດດັ່ງກ່າວໄດ້ຈັດຂຶ້ນນັບແຕ່ວັນທີ 23 ຫາ 26 ມັງກອນ 2021 ນີ້. ຕະຫຼອດ 4 ວັນຂອງງານຄາດວ່າຈະມີຜູ້ເຂົ້າຮ່ວມ ຫຼື ຜູ້ທີ່ສັດທານໍາພຣະເຈົ້າໄຊຍະເສດຖາທິລາດ ຫຼາຍພັນຄົນເຂົ້າຮ່ວມ.

    ທ່ານບຸນເສີດ ເສດທິລາດ ຄະນະປະຈໍາພັກແຂວງ ຮອງເຈົ້າແຂວງອັດຕະປື ທັງເປັນຜູ້ຊີ້ນໍາວຽກງານວັດທະນະທໍາ-ສັງຄົມ ແລະຮັບຜິດຊອບໂຄງການກໍ່ສ້າງ ອະນຸສາວະລີພຣະເຈົ້າໄຊຍະເສດຖາທິລາດໄດ້ກ່າວຕໍ່ທີມງານວຽງຈັນທາຍເມື່ອວັນທີ 23 ມັງກອນ 2021 ທີ່ຜ່ານມາວ່າ:

    ຕະຫຼອດ 4 ວັນຂອງງານສົມໂພດດັ່ງກ່າວໄດ້ມີການ ຕັ້ງກອງບຸນກອງບຸນ 38 ກອງ, ໄດ້ມີການເຮັດພິທີທາງສາດສະໜາ ເປັນຕົ້ນແມ່ນການບວດພຣະ, ຟ້ອນລໍຖວາຍພື້ນເມືອງ, ໝໍລໍາສີພັນ ດອນຄົບງັນກອງບຸນ, ພິທີຄອບໄຂ່ວ, ແຫ່ຜາສາດເຜິ້ງອ້ອມກົມມະລຽນ, ພິທີສູດມຸງຄຸນ, ພິທີມອບຮັບພຣະພຸດທະຮູບ, ຮັບໂມທະນາບຸນ,
    ພິທີສົມໂພດ, ພິທີຕັກບາດ ແລະ ພິທີມອບ-ຮັບອະນຸສາວະລີພຣະເຈົ້າໄຊຍະເສດຖາທິລາດ.

    ທ່ານບຸນເສີດ ໄດ້ກ່າວຕື່ມວ່າ: ຕາມແຜນແລ້ວງານດັ່ງກ່າວແມ່ນຈະຈັດໃຫຍ່ແຕ່ຍ້ອນມີການແຜ່ລະບາດຂອງພະຍາດໂຄວິດ-19 ແລະ ເພື່ອເປັນການປ້ອງກັນພະຍາດດັ່ງກ່າວໄດ້ມີການຕັດອອກຫຼາຍລາຍການເຊັ່ນ:

    ງານຕະຫຼາດນັດ 5 ຕົວເມືອງ, ງານສະແດງສິລະປະທ້ອງຖິ່ນ, ງານເດີນແບບຊຸດຊົນເຜົ່າ ທີ່ມີ 11 ຊົນເຜົ່າພາຍໃນແຂວງອັດຕະປື, ງານປະກວດສາວເມືອງອົງການ (ເມືອງອົງການເປັນເມືອງຕົ້ນກໍາເນີດແຂວງອັດ ຕະປີໃນສະໄໝກ່ອນ) ແລະ ກິດຈະກໍາອື່ນໆອີກ

    ຈໍານວນໜຶ່ງ. ສະເພາະມາດຕະການປ້ອງກັນພະຍາດໂຄວິດ-19, ພະແນກສາທາລະນະສຸກແຂວງໄດ້ຕັ້ງຈຸດກວດຢູ່ 3-4 ຈຸດອ້ອມ ອະນຸສາວະລີ ໂດຍມີການວັດແທກອຸນຫະພູມທຸກຄົນ, ມີການລ້າງມືດ້ວຍເຈວ ຫຼື ສະບູ, ໃສ່ຜ້າອັດປາກ, ກ່ອນເຂົ້າໃນສະຖານທີ່ງານ, ຮັກສາໄລຍະຫ່າງ.

    ງານດັ່ງກ່າວຈະຈັດແບບກະທັດຮັດແຕ່ເຊື່ອວ່າຈະມີປະຊາຊົນຈໍານວນຫຼາຍເຂົ້າຮ່ວມຊຶ່ງທາງຜູ້ຈັດງານຂໍຮຽກຮ້ອງໃຫ້ປະຕິບັດມາດຕະການປ້ອງກັນພະຍາດໂຄວິດ-19 ຕາມການແຈ້ງການຂອງ ຄະນະສະເພາະກິດວາງອອກ.

    ການຫຼໍ່ຮູບປັ້ນພຣະເຈົ້າໄຊຍະເສດຖາທິລາດ, ຊ້າງ ແລະ ແຍ່ງປະທັບເທິງຫຼັງຊ້າງແມ່ນໄດ້ຫຼໍ່ຢູ່ ນະຄອນຫຼວງວຽງຈັນ ໂດຍໄດ້ມີການແຫ່ມາປະດິດສະຖານໄວ້ທີ່ບ້ານຫາດຊາຍຂາວ ເມືອງໄຊເສດຖາ, ແຂວງອັດຕະປື ໃນເດືອນສິງຫາ 2020 ທີ່ຜ່ານມາ, ພາຍຫຼັງທີ່ມີການມອບ-ຮັບນີ້,

    ອໍານາດການປົກຄອງແຂວງອັດຕະປືຈະເປັນຜູ້ຮັກສາດູແລ ແລະ ໃຫ້ປະຊາຊົນແຂວງອັດຕະປືໄດ້ກາບໄຫວ້ ແລະ ເປັນບ່ອນສຶກສາຮຽນຮູ້ທາງປະຫວັດຂອງພຣະເຈົ້າໄຊຍະເສດຖາທິລາດໃຫ້ຄົນລຸ້ນຫຼັງ.

    ຂ່າວ: ວຽງຈັນທາຍ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.