ຊົມເຊີຍ!! ລັດຖະບານສະຫະລັດອາເມລິກາ ມອບພາຫະນະ ແລະ ອຸປະກອນພາກສະໜາມ ໃຫ້ແກ່ ໂຄງການເກັບກູ້ລະເບີດແຫ່ງຊາດ ເພື່ອນຳໃຊ້ເຂົ້າໃນວຽກງານເກັບກູ້ລະເບີດຢູ່5 ແຂວງເປົ້າໝາຍ.

0
513

ໃນວັນທີ 19 ມັງກອນ 2021, ໂຄງການເກັບກູ້ລະເບີດແຫ່ງຊາດ (ຄກລ) ໄດ້ຮັບພາຫະນະ ແລະ ອຸປະກອນພາກສະໜາມ ພາຍໃຕ້ ການຊ່ວຍເຫຼືອຂອງລັດຖະບານສະຫະລັດອາເມລິກາ, ເຊິ່ງພິທີມອບ-ຮັບໃນຄັ້ງນີ້ ໄດ້ຈັດຂຶ້ນທີ່ ສູນຝຶກອົບຮົມໂຄງການເກັບກູ້ລະເບີດແຫ່ງຊາດ, ບ້ານອີໄລໃຕ້, ເມືອງນາຊາຍທອງ, ນະຄອນຫຼວງວຽງຈັນ.

ການຊ່ວຍເຫຼືອຈາກລັດຖະບານສະຫະລັດອາເມລິກາໃນຄັ້ງນີ້ ລວມມີ ລົດໂຕໂຢຕາແລນກຸຍເຊີ ຈຳນວນ 16 ຄັນ, ເຄື່ອງກວດລະເບີດ ຈໍານວນ 134 ຊຸດ, ລວມມູນຄ່າທັງໝົດ 1,19 ລ້ານໂດລາສະຫະລັດ ເພື່ອມອບໃຫ້ແກ່ທີມງານພາກສະໜາມຂອງໂຄງການເກັບກູ້ລະເບີດແຫ່ງຊາດ ທີ່ປະຕິບັດໜ້າທີ່ຢູ່ໃນ 5 ແຂວງ ທີ່ໄດ້ຮັບການສະໜັບສະໜູນຈາກ ລັດຖະບານສະຫະລັດອາເມລິກາ ຄື: ແຂວງ ອັດຕະປື, ແຂວງ ຫົວພັນ, ແຂວງ ຄຳມ່ວນ, ແຂວງ ສາລະວັນ ແລະ ແຂວງ ສະຫວັນນະເຂດ.

ໃນພິທີ ທ່ານ ປີເຕີ ເຮມອນ ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ໄດ້ໃຫ້ກຽດກ່າວມີຄໍາເຫັນວ່າ: “ການສະໜັບສະໜູນວຽກງານເກັບກູ້ລະເບີດ ໃຫ້ແກ່ ຄກລ ແມ່ນສະທ້ອນໃຫ້ເຫັນເຖິງ ການຮ່ວມມືຢ່າງໃກ້ຊິດ ແລະ ຍາວນານ ລະຫວ່າງ ລັດຖະບານສະຫະລັດອາເມລິກາ ແລະ ລັດຖະບານແຫ່ງ ສປປ ລາວ ເປັນເວລາຫຼາຍກວ່າສອງທົດສະວັດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງແຕ່ປາງສົງຄາມ.

ທ່ານ ປະເດີມພອນ ສົນທະນີ, ຮອງລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ ກ່າວວ່າ: “ການຊ່ວຍເຫຼືອຈາກລັດຖະບານສະຫະລັດອາເມລິກາໃນຄັ້ງນີ້ ເປັນການຊ່ວຍເຫຼືອດ້ານມະນຸດສະທຳອັນຍິ່ງໃຫຍ່ ໃນການແກ້ໄຂບັນຫາລະເບີດບໍ່ທັນແຕກທີ່ເປັນອຸປະສັກຕໍ່ການພັດທະນາ ຢູ່ ສປປ ລາວ, ທັງເປັນການຊ່ວຍຊີວິດຂອງປະຊາຊົນລາວບັນດາເຜົ່າໃຫ້ປອດໄພຈາກການບາດເຈັບລົ້ມຕາຍຍ້ອນອຸປະຕິເຫດຈາກລະເບີດບໍ່ທັນແຕກ”.

ທ່ານຍັງໄດ້ກ່າວສະແດງຄວາມຂອບໃຈເປັນຢ່າງສູງມາຍັງລັດຖະບານ ແລະ ປະຊາຊົນ ສະຫະລັດອາເມລິກາ ທີ່ໃຫ້ການຊ່ວຍເຫຼືອແກ່ ສປປ ລາວ ທາງດ້ານວຽກງານມະນຸດສະທໍາຕະຫຼອດມາ ແລະ ຫວັງຢ່າງຍິ່ງວ່າ ລັດຖະບານສະຫະລັດອາເມລິກາ ຈະສືບຕໍ່ໃຫ້ການຊ່ວຍເຫຼືອແກ່ ສປປ ລາວ ກໍຄືໂຄງການເກັບກູ້ລະເບີດແຫ່ງຊາດ ເພື່ອສືບຕໍ່ຈັດຕັ້ງປະຕິບັດວຽກງານການແກ້ໄຂບັນຫາລະເບີດບໍ່ທັນແຕກ ຕື່ມອີກໃນຕໍ່ໜ້າ.

ທີ່ມາ:Lao National Unexploded Ordnance Programme

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.