ຊົມເຊີຍສຸດໃຈ ຮ່ວມແຮງສ້າງທາງປູເບຕົງເສັ້ນທຳອິດຂອງເມືອງສອງຄອນ

0
160

ໃບໜ້າໃໝ່ເມືອງສອງຄອນ ກຳລັງຈະປະກົດຫຼັງປະຊາຊົນ, ພະນັກງານ ທະຫານຕຳຫຼວດທົ່ວເມືອງສອງຄອນໄດ້ສາມັກຄີກັນສ້າງເສັ້ນທາງປູເບຕົງເສັ້ນທຳອິດຂອງຕົນຂຶ້ນ ເຊິ່ງຄວາມຍາວພຽງ 600 ແມັດແຕ່ມີຄວາມໝາຍທີ່ຍິ່ງໃຫຍ່ທາງເສັ້ນນີ້ໄດ້ມາຈາກພະລັງນ້ຳໃຈ ແລະນ້ຳເຫື່ອແຮງງານຂອງທຸກພາກສ່ວນ.

ຊ່ວຍກັນເພື່ອໃບໜ້າໃໝ່ຂອງປະຊາຊົນທົ່ວທັ້ງເມືອງ

ການກໍ່ສ້າງເສັ້ນທາງເບຕົງ ເສັ້ນທຳອິດຂອງເມືອງສອງຄອນ ແຂວງສະຫວັນນະເຂດ ແມ່ນມີຄວາມຍາວ 600 ແມັດ, ກວ້າງ 6 ແມັດ ໜາ 15 ຊັງຕີແມັດ ເຊິ່ງມີກຳລັງແຮງງານຫຼັກແມ່ນປະຊາຊົນບ້ານຫຼັກເມືອງ ເມືອງສອງຄອນ ທີ່ໄດ້ຕັດສິນໃຈ ສູ້ຊົນ ບຸກບືນ ຈົນໃກ້ຈະປະສົບຜົນສຳເລັດ ຍັງເຫລືອພຽງ 100 ແມັດ ກວ້າງ 3 ແມັດ ເທົ່ານັ້ນ.

ຢາກກ້າວໜ້າ, ປະເທດຊາດພັດທະນາທຸກພາກສ່ວນຕ້ອງເປັນເຈົ້າການຮ່ວມກັນ

ໃນຕອນເຊົ້າມື້ນີ້ ພໍ່ແມ່ປະຊາຊົນໜ່ວຍ ທີ 7-12 ຂອງບ້ານຫຼັກເມືອງ ເມືອງສອງຄອນ ແຂວງສະຫວັນນະເຂດ ໄດ້ພ້ອມກັນ ສາມັກຄີ ປະກອບສ່ວນດ້ານແຮງງານສູ້ຊົນ ສືບຕໍ່ ສ້າງທາງເບຕົງ ເພື່ອໃຫ້ສຳເລັດໂດຍໄວທີ່ສຸດ.

ເສັ້ນທາງນີ້ໄດ້ເລີ່ມລົງມືກໍ່ສ້າງມາແຕ່ວັນທີ 27 ພະຈິກ 2020 ເປັນຕົ້ນມາ ການກໍ່ສ້າງໄດ້ດຳເນີນໄປຢ່າງຕໍ່ເນື່ອງ ແຮງງານຫຼັກກໍ່ແມ່ນປະຊາຊົນບ້ານຫຼັກເມືອງ ພ້ອມດຽວກັນນັ້ນ ບັນດາຫ້ອງການ ແລະສາຂາວິສາຫະກິດປະຈຳເມືອງດັ່ງກ່າວກໍ່ໄດ້ສາມັກຄີກັນຊ່ວຍແບ່ງເບົາແຮງງານປະຊາຊົນໂດຍການເຂົ້າສ້າງເສັ້ນທາງນີ້ຢ່າງເປັນຂະບວນຟົດຟື້ນ ໂດຍການຊີ້ນຳຂອງທ່ານ ພຸດທະວົງ ທຳມະຈັກ ຮອງເລຂາພັກເມືອງ ຜູ້ຊີ້ນຳວຽກງານພັກພະນັກງານການເມືອງ.

ທັງໝົດນີ້ເປັນການສະແດງໃຫ້ເຫັນເຖິງຄວາມສາມັກຄີເປັນປືກແຜ່ນ ເພື່ອໃບໜ້າໃໝ່ຂອງເມືອງສອງຄອນ ແລະເໜືອສິ່ງອື່ນໃດຄືການເສຍສະຫຼະເພື່ອສ່ວນລວມຂອງພະນັກງານລັດຖະກອນຈາກສຳນັກງານຕ່າງໆອ້ອມຂ້າງເມືອງ, ຫ້ອງການຕຳຫຼວດ, ທະຫານກໍ່ລ້ວນເຂົ້າຮ່ວມຂະບວນການສ້າງສາໃນຄັ້ງນີ້.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.