ອຸຕຸຝາກເຕືອນຊາວກະສິກອນໃຫ້ເລື່ອນການຜະລິດເພື່ອສຸຂະພາບ

0
79

ຈາກສະພາບອາກາດໜາວເຢັນທີ່ຢູ່ທົ່ວທຸກພາກຂອງປະເທດເຮົາ ເຊິ່ງອາດສົ່ງຜົນກະທົບຕໍ່ສຸຂະພາບຂອງປະຊາຊົນຊາວກະສິກອນດັ່ງນັ້ນ, ເພື່ອຫຼຸດຜ່ອນຜົນເສຍຫາຍຈາກສະພາບອາກາດດັ່ງກ່າວ, ກົມອຸຕຸແນະນໍາຊາວກະສິກອນເລື່ອນການປັກດໍາເຂົ້າແຊງອອກໄປກ່ອນ.

ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແຈ້ງເຕືອນອຸຕຸກະເສດ ໄລຍະວັນທີ 13-17 ມັງກອນ 2021 ຈາກຜົນການພະຍາກອນຂອງລະບົບອຸຕຸກະເສດ (LaCSA) ໄລຍະວັນທີ 13 – 17 ມັງກອນ 2021 ແລະ ຕາມການຄາດຄະເນສະພາບອາກາດ ປະຈຳອາທິດ

ມວນອາກາດໜາວເຢັນຈາກປະເທດຈີນ ຍັງມີກໍາລັງແຮງແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ, ສົມທົບກັບລົມມໍລະສຸມຕາເວັນອອກສ່ຽງເໜືອພັດປົກຄຸມ ເຊິ່ງຈະເຮັດໃຫ້ອຸນຫະພູມອາກາດໜາວຫຼາຍ ໂດຍສະເພາະຢູ່ເຂດພູສູງ, ພູດອຍ ແລະ ຮ່ອມພູເປັນຕົ້ນແມ່ນບັນດາແຂວງ ພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ອາກາດຈະໜາວເຢັນຫຼາຍ ພ້ອມມີຝົນຕົກຄ່ອຍເປັນບາງໂອກາດ.

ສ່ວນຢູ່ພາກກາງ ແລະ ພາກໃຕ້ ອາກາດຈະເຢັນ ຫາ ໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າ ແລະ ມີລົມພັດແຮງເປັນບາງໂອກາດໃນແຕ່ລະພາກ. ໃນວັນທີ 13 – 17 ມັງກອນ 2021 ມວນອາກາດເຢັນຍັງປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງປານກາງ ສົມທົບກັບລົມຕາເວັນອອກສ່ຽງເໜືອພັດປົກຄຸມ ເຊິ່ງຈະເຮັດໃຫ້ອາກາດອຸ່ນຂຶ້ນ 2 ຫາ 4 ອົງສາ ຢູ່ທົ່ວໄປໃນແຕ່ລະພາກ.

ແຕ່ໃນເວລາດຽວກັນສະພາບອາກາດຍັງໜາວເຢັນຫຼາຍຢູ່ແຂວງພາກເໜືອ, ເຂດພູສູງ, ພູດອຍ, ແຂວງໄຊສົມບູນ ແລະ ເຂດພູພຽງບໍລິເວນ ພ້ອມມີໝອກໜາປົກຫຸ້ມຢູ່ທົ່ວໄປໃນຕອນກາງຄືນ ຫາ ຕອນເຊົ້າ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖີ່ນ.

ດັ່ງນັ້ນ, ຈຶ່ງແຈ້ງແນະນຳໃຫ້ປະຊາຊົນ ແລະ ຊາວກະສິກອນ ບັນດາແຂວງໃນຂອບເຂດທົ່ວປະເທດ ຕໍ່ກັບສະພາບອາກາດທີ່ໜາວເຢັນດັ່ງກ່າວ ອາດສົ່ງຜົນກະທົບຕໍ່ການປູກເຂົ້ານາແຊງ. ສະນັ້ນ, ຈຶ່ງແນະນຳຊາວກະສິກອນ ເລື່ອນການປັກດຳເຂົ້າແຊງ.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.