ສປປລາວ ຈະສັກວັກຊີນທີ່ຄາດວ່າຈະໄດ້ຮັບຈາກໂຄງການCOVAX ໃນເດືອນເມສາ ປີ2021 ສຳລັບປະຊາກອນ 1,2 ລ້ານຄົນ.

0
3431

ທ່ານ ຮສ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ຖະແຫຼງຂ່າວເມື່ອວັນທີ 31 ທັນວາ 2020 ກ່ຽວກັບວັກຊີນ ຫລື ວັກແຊັງປ້ອງກັນໂຄວິດ- 19 ວ່າ:ມື້ນີ້ ຂ້າພະເຈົ້າ ຕາງໜ້າໃຫ້ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂ ການລະບາດພະຍາດໂຄວິດ -19 ຂໍແຈ້ງລາຍງານໃຫ້ພໍ່ແມ່ປະຊາຊົນ, ພະນັກງານ, ທະຫານ, ຕຳຫຼວດທຸກຄົນຊາບ ຕໍ່ ກັບສະພາບຄວາມຄືບໜ້າດ້ານການນຳໃຊ້ ວັກແຊັງປ້ອງກັນໂຄວິດ- 19 ໃນ ສປປ ລາວ ໃນ 3 ຈຸດສໍາຄັນຄື: (1)ສະພາບວັກແຊັງ ປ້ອງກັນໂຄວິດ -19 ໃນໂລກ ລາວເຮົາໄດ້ມີການພົວພັນ ຮ່ວມມື ແນວໃດ; (2)ລາວເຮົາໄດ້ຮັບ ວັກແຊັງ ຈາກ ແຫຼ່ງສະໜອງໃດ ແລະ ແມ່ນໃຜແດ່ຈະໄດ້ສັກ; (3)ຄວາມຕ້ອງການທາງດ້ານງົບປະມານ.

ກະຊວງສາທາລະນະສຸກ ຮ່ວມມືກັບ ກະຊວງການເງິນ ໄດ້ສົ່ງແຜນຂໍການຊ່ວຍເຫຼືອ ດ້ານວັກແຊັງ ປ້ອງກັນ ໂຄວິດ 19 ໃຫ້ COVAX FACILITY GAVI. ມາຮອດປັດຈຸບັນ ສປປ ລາວ ໄດ້ຮັບຄໍາຕອບວ່າ ໄດ້ເປັນ 1 ໃນ 92 ປະເທດ ທີ່ຈະໄດ້ຮັບການຊ່ວຍເຫຼືອລ້າ ວັກແຊັງຕ້ານໂຄວິດ 19 ໃນປີ 2021 ຄາດຄະເນ ປະມານ 15 ຫາ 20% ຂອງປະຊາກອນທັງໝົດ ຫລື ເທົ່າກັບ 1,4 ລ້ານຄົນ. ຄາດວ່າຈະໄດ້ຮັບ ແລະ ເລີ່ມສັກວັກແຊັງທີ່ໄດ້ຮັບຈາກ COVAX FACILITY GAVI ພາຍໃນ ເດືອນ ເມສາ 2021.

ແມ່ນໃຜແດ່ຈະໄດ້ສັກວັກແຊັງ ທີ່ໄດ້ຈາກ COVAX FACILITY ໃນປີ 2021 ນີ້. ຍ້ອນແມ່ນການສັກວັກແຊັງແກ້ໄຂພາວະສຸກເສີນການລະບາດຂອງພະຍາດ ຈຶ່ງໄດ້ ສຸມໃສ່ກຸ່ມທີ່ມີຄວາມສ່ຽງສູງ ຫາ ປານກາງ ເຊັ່ນ: ແພດໝໍ, ພະຍາບານ ທັງໝົດ ລວມທັງ ສູນກາງແລະ ທ້ອງຖິ່ນ ພາຍໃນຂະແໜງສາທາລະນະສຸກ, ໂຮງໝໍທະຫານ, ໂຮງໝໍຕໍາຫຼວດ, ອາສາສະໝັກແພດບ້ານ, ອາສາສະໝັກສັງຄົມສົງເຄາະ, ຜູ້ສູງອາຍຸ, ຜູ້ມີພະຍາດປະຈຳຕົວ ແຕ່ບໍ່ນອນໃນຂໍ້ຫ້າມສັກວັກແຊັງ, ຜູ້ອອກແຮງງານເຄື່ອນຍ້າຍ, ຜູ້ເດີນທາງເຂົ້າອອກ ແລະ ແຮສຸກເສີນ.

ກະຊວງສາທາລະນະສຸກ, ທະນາຄານໂລກ, ອົງການອະນາໄມໂລກ ແລະ ອຸຍນິເຊັບ ໄດ້ຮ່ວມມືປະເມີນງົບປະມານຄວາມຕ້ອງການ ໃນການຈັດຫາ ແລະ ນໍາໃຊ້ວັກແຊັງ ສັກຄົບໂດສ ໃຫ້ຜູ້ໜຶ່ງ ສະເລ່ຍເປັນເງິນ 17,74 ໂດລາສະຫະລັດ ຫລື ເກືອບ 18 ໂດລາ, ຖ້າສັກໃຫ້ໄດ້ທຸກຖ້ວນໜ້າ ປະເມີນງົບປະມານທີ່່ຕ້ອງການທັງໝົດ ເກືອບ 100 ລ້ານໂດລາ.

ທີ່ມາ:ຂ່າວເສດຖະກິດ ການຄ້າ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.