ຈັບ! ເປົ້າໝາຍຄ້າຂາຍຢາຜິດກົດໝາຍ 4 ຄົນ ພ້ອມຂອງກາງ ຢາໄອສ໌ 43 ກິໂລກຣາມ

0
67

ເມື່ອຕອນບ່າຍວັນທີ 28 ທັນວາ 2020 ທີ່ຜ່ານມາ ເຈົ້າໜ້າທີ່ຕຳຫຼວດ ພະແນກສະກັດກັ້ນ ກອງບັນຊາການ ປກສ ແຂວງອັດຕະປື ໄດ້ນຳຕົວຜູ້ຖືກຫາ ຈຳນວນ 4 ຄົນ, ຍິງ 2 ຄົນ ມາດຳເນີນການກວດຄົ້ນລົດ ໂຕໂຢຕາ ປຣາໂດ ປ້າຍທະບຽນ ຈໍາປາສັກ ກຄ 2928 ທີ່ພວກກ່ຽວໄດ້ນຳໃຊ້ ເຂົ້າໃນການລັກລອບຂົນສົ່ງ-ຄ້າຂາຍຢາຜິດກົດໝາຍ.

ຜ່ານການກວດຄົ້ນພົບວ່າ: ພວກກ່ຽວໄດ້ຊຸກເຊື່່ອງຢາຜິດກົດໝາຍ ປະເພດຢາໄອສ໌ ຈຳນວນ 25 ຫໍ່ ນ້ຳໜັກ 43 ກິໂລກຼາມ ແລະ ຜົງຂາວເຮໂຣອິນ 1 ຖົງ ນ້ຳໜັກ 1 ກິໂລກຣາມ ໄວ້ຢູ່ບໍລິເວນຖັງນ້ຳມັນຂອງລົດຄັນດັ່ງກ່າວ.

ໂດຍອີງຕາມການເປີດເຜີຍຂອງເຈົ້າໜ້າທີ່ຕໍາຫຼວດປກສ ແຂວງອັດຕະປື ໃຫ້ຮູ້ວ່າ: ໃນຄັ້ງວັນທີ 24 ທັນວາ 2020 ທີ່ຜ່ານມາ ໄດ້ສົມທົບກັບເຈົ້າໜ້າທີ່ດ່ານເຊປຽນ,ທະຫານກອງຮ້ອຍຊາຍແດນ 543, ປກສ ກຸ່ມບ້ານສົ້ມປ່ອຍ ແລະ ອໍານາດການປົກຄອງບ້ານຫາດໃຫຍ່ ເມືອງສະໜາມໄຊ ແຂວງອັດຕະປື ກັກຕົວເປົ້າໝາຍລັກລອບຂົນສົ່ງ-ຄ້າຂາຍຢາຜິດກົດໝາຍ ຈໍານວນ 4 ຄົນ, ຍິງ 2 ຄົນ

ຜູ້ຊາຍຊື່: ທ້າວ ສົມວິດ ອາຍຸ 45 ປີ ປະຊາຊົນບ້ານອີ່ໄລໃຕ້ ເມືອງໄຊເສດຖາ ນະຄອນຫຼວງວຽງຈັນ, ທ້າວ ຂັນທອງ ອາຍຸ 24 ປີ ປະຊາຊົນບ້ານຂັນໝາກ ເມືອງວັງວຽງ ແຂວງວຽງຈັນ, ນາງ ແກ້ວວິໄລ ອາຍຸ 30 ປີ ປະຊາຊົນບ້ານໂພນໄຊ ນະຄອນປາກເຊ ແຂວງຈຳປາສັກ ແລະ ນາງ ແປັບຊີ ອາຍຸ 24 ປີ ປະຊາຊົນບ້ານນໍ້າພ້າວ ເມືອງວັງວຽງ ແຂວງວຽງຈັນ ພ້ອມຂອງກາງຢາໄອສ໌

ຈຳນວນ 25 ຫໍ່ ນ້ຳໜັກ 43 ກິໂລກຣາມ, ຜົງຂາວເຮໂຣອິນ 1 ຖົງ ນ້ຳໜັກ 1 ກິໂລກຣາມ, ໂທລະສັບ 5 ເຄື່ອງ, ເງິນກີບ 4 ລ້ານກວ່າກີບ, ເງິນບາດ 6.300 ບາດ, ເງິນໂດລາ 7.000 ໂດລາ ແລະ ລົດໃຫຍ່ 1 ຄັນ.ຜ່ານການສືບສວນ – ສອບສວນຂັ້ນເບື້ອງຕົ້ນຂອງເຈົ້າໜ້າທີ່ຕໍາຫຼວດ ພວກກ່ຽວໃຫ້ການສາລະພາບວ່າ: ຢາຈໍານວນດັ່ງກ່າວ ແມ່ນຢາຜິດກົດໝາຍຂອງພວກກ່ຽວແທ້ ເຊິ່ງໄດ້ຕິດຕໍ່ພົວພັນຫາ ທ້າວ ບຸນ (ຄົນນະຄອນຫຼວງວຽງຈັນ) ກ່ຽວກັບການຂົນສົ່ງຢາເທື່ອນີ້ ໃຫ້ເຖົ້າແກ່ຄົນກໍາປູເຈຍ ຢູ່ເຂດດ່ານເຊປຽນ.

ພາຍຫຼັງໄດ້ລົງມາເບິ່ງເສັ້ນທາງຂົນສົ່ງຢາ ແລະ ພົບປະກັບທີມງານຂົນສົ່ງເມືອກໍາປູເຈຍແລ້ວ ກໍໄດ້ພາກັນລົງມາເມືອງສະໜາມໄຊ ແຂວງອັດຕະປື ເພື່ອຂົນສົ່ງຢາດັ່ງກ່າວ ໃນວັນທີ 24 ທັນວາ 2020 ຈຶ່ງຖືກເຈົ້າໜ້າທີ່ທະຫານຊາຍແດນ ແລະ ປກສ ກຸ່ມບ້ານ ເຂົ້າມາກັກຕົວທັງ 4 ຄົນ ພ້ອມຂອງກາງຈໍານວນດັ່ງກ່າວ.ເຈົ້າໜ້າທີ່ຕໍາຫຼວດ ປກສ ແຂວງອັດຕະປື ໃຫ້ຮູ້ຕື່ມອີກວ່າ: ປັດຈຸບັນ, ຄະດີດັ່ງກ່າວ ພວມຢູ່ໃນຂັ້ນຕອນດໍາເນີນການສືບສວນ-ສອບສວນ ເພື່ອຂະຫຍາຍຜົນຫາຜູ້ຮ່ວມຂະບວນການກະທໍາຜິດ ມາດໍາເນີນຕາມລະບຽບກົດໝາຍ.

ພາບ-ຂ່າວ: ປກສ ແຂວງອັດຕະປື,ເສົາດາລົງ ເພັດສົງຄາມ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.