ຈຳປາສັກ ແລະ ອຸບົນຣາຊະທານີ ເພື່ອຫາລືຮ່ວມກັນປ້ອງກັນໂຄວິດ

0
161

ທ້າຍອາທິດຜ່ານມາ ທີ່ຫ້ອງວ່າການແຂວງຈຳປາສັກ, ແຂວງຈຳປາສັກ ແລະ ຈັງຫວັດອຸບົນຣາຊະທານີ ໄດ້ມີກອງປະຊຸມພົບປະ, ປຶກສາຫາລືເພື່ອວາງມາດຕະການ ແລະ ການຮ່ວມມືປ້ອງກັນ ການລະບາດຂອງພະຍາດ COVID-19 ຮ່ວມກັນ ໂດຍຜ່ານລະບົບ Video Conference. ມີ ຄະນະຜູ້ແທນ ຝ່າຍຈັງຫວັດອຸບົນຣາຊະທານີ ນຳໂດຍ ທ່ານ ສຸພາສິດ ກໍຈະເລີນຍົດ ຮອງຜູ້ວ່າຣາຊະການ ຈັງຫວັດອຸບົນຣາຊະທານີ, ພ້ອມດ້ວຍ ຄະນະຜູ້ບໍລິຫານຈັງຫວັດອຸບົນຣາຊະທານີ ແລະ ຄະນະຜູ້ແທນ ຝ່າຍ ແຂວງຈຳປາສັກ ນຳໂດຍ ທ່ານ ມະໄລທອງ ກົມມະສິດ ຮອງ ເຈົ້າແຂວງຈຳປາສັກ, ມີ ຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນລາວ-ໄທ, ບັນດາທ່ານ

ເຈົ້າເມືອງ ທີ່ມີຊາຍແດດຕິດຈອດກັບ ຈັງຫວັດອຸບົນຣາຊະທານີ ຂອງ ຣາຊະອານາຈັກໄທ, ການນຳພະແນກການ, ຫ້ອງການທີ່ກ່ຽວຂ້ອງ ເຂົ້າຮ່ວມ.ກອງປະຊຸມພົບປະຫາລືດັ່ງກ່າວ, ແມ່ນເພື່ອເປັນການກຳນົດທິດທາງ ການຮ່ວມມືໃນຕໍ່ໜ້າ, ເພີ່ມທະວີ ການຕິດຕາມກວດກາ, ການປະສານສົມທົບແກ້ໄຂບັນຫາຕ່າງໆ ເກີດຂື້ນຕາມຊາຍແດນ, ການດຳເນີນມາດຕະການຕ່າງໆ ເພື່ອສະກັດກັ້ນ, ປ້ອງກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ໃນການສືບຕໍ່ປະຕິບັດມາດຕະການຜ່ອນຜັນ, ມາດຕະການປ້ອງກັນ, ຄວບຄຸມ, ສະ ກັດກັ້ນ ແລະ ແກ້ໃຂການລະບາດພະຍາດ COVID-19 ທີ່ລັດຖະບານ ທັງສອງຝ່າຍ ໄດ້ວາງອອກ ແລະ ຍັງເປັນການເພີ່ມທະວີການ

ເຄື່ອນໄຫວ ວຽກງານການຕ່າງປະເທດຢ່າງຕັ້ງໜ້າ, ສືບຕໍ່ຂະຫຍາຍສາຍພົວພັນທີ່ດີ ຂອງສອງປະເທດລາວ-ໄທ, ເຊິ່ງຄົບຮອບວາລະ ທີ່ມີຄວາມໝາຍຄວາມສຳຄັນ ທີ່ ສປປ ລາວ ແລະ ຣາຊະອານາຈັກໄທ ໄດ້ມີສາຍພົວພັນການທູດຮ່ວມກັນເປັນເວລາ 70 ປີ ແລະ ສອງຝ່າຍ ແມ່ນໄດ້ຕົກລົງເຫັນດີ ທີ່ຈະສືບຕໍ່ຈັດຕັ້ງປະຕິບັດ ເພີ່ມທະວີການຕິດຕາມກວດກາ ການເຂົ້າ-ອອກ ຕາມດ່ານຊາຍແດນ ເພື່ອຮັບປະກັນບໍ່ໃຫ້ມີການເຂົ້າ-ອອກ ແບບຊະຊາຍ ຫລື ມີການລັກ ລອບເຂົ້າອອກ ບໍ່ຜ່ານດ່ານຊາຍແດນ ເພື່ອຮັບປະກັນບໍ່ໃຫ້ມີຄວາມສ່ຽງ ໃນການນຳເຊື້ອພະຍາດ COVID-19 ມາລະບາດ, ເຫັນດີໃຫ້ເຈົ້າໜ້າທີ່ກ່ຽວຂ້ອງ ຂອງແຕ່ລະຝ່າຍ ໃນການຕິດຕາມ ກວດກາ ຕາມຊາຍແດນ

ເພື່ອຮັກສາຄວາມຄວາມສະຫງົບຮຽບຮ້ອຍ ຕາມຊາຍແດນຈໍາປາສັກ-ອຸບົນຣາຊະທານີ ແລະ ເຫັນດີແຕ່ລະຝ່າຍ ໃຫ້ມີການປະຊາສຳພັນ ທຳຄວາມເຂົ້າໃຈ ກັບອົງການປົກຄອງບ້ານ, ພີ່ນ້ອງປະຊາຊົນ ທັງ 2 ປະເທດ ກ່ຽວກັບສະຖານະການແຜ່ລະບາດພະຍາດ COVID-19.ທັງໝົດ, ໄດ້ກາຍເປັນເງື່ອນໄຂສຳຄັນໃນການຮ່ວມມືສອງຝ່າຍ ໃຫ້ມີຄວາມແໜ້ນແຟ້ນຍິ່ງຂຶ້ນ, ທັງເປັນຂີດໝາຍອັນສຳຄັນ ເຮັດໃຫ້ສອງແຂວງພວກເຮົາ ລະຫວ່າງ ແຂວງຈຳປາສັກ ກັບຈັງຫວັດອຸ ບົນຣາຊະທານີ ມີຄວາມສະຫງົບ, ເປັນລະບຽບຮຽບຮ້ອຍຕາມເຈດຕະນາລົມ ຂອງທັງສອງປະເທດ.